वासिङ्टन — अमेरिकी राष्ट्रपति डोनाल्ड ट्रम्पले इरानलाई तत्काल वार्तामा फर्कन चेतावनी दिएका छन् । वार्तामा नआए आगामी साता इरानका पुल र विद्युत गृहहरूमा आक्रमण गर्ने धम्की दिएका छन् ।

दुई देशबीच लगातार चौथो दिन पनि गोलाबारी जारी रहेका बेला फक्स न्युजसँगको अन्तर्वार्तामा राष्ट्रपति ट्रम्पको यस्तो चेतावनी दिएका हुन् । 

यसअघि ट्रम्पको निर्देशनमा अमेरिकी सेनाले इरानी बन्दरगाहहरूमा नाकाबन्दी लगाएको थियो । 'आगामी साता उनीहरूका लागि निकै खराब हुनेछ । यदि उनीहरू वार्ताको टेबलमा आउँदैनन् भने हामी उनीहरूका सबै विद्युत गृह र पुलहरू ध्वस्त पारिदिनेछौँ ।'

राष्ट्रपति ट्रम्पले यसअघि गत अप्रिलमा पनि इरानका नागरिक पूर्वाधार, पुल र विद्युत गृहहरूमा बमबारी गर्ने धम्की दिएका थिए ।

ट्रम्पको उक्त धम्कीप्रति तत्कालै कडा प्रतिक्रिया दिँदै संयुक्त राष्ट्रसङ्घका मानवअधिकार प्रमुख भोल्कर टर्कले सर्वसाधारण र नागरिक पूर्वाधारहरूमाथि जानाजानी आक्रमण गर्नु युद्ध अपराध हुने चेतावनी दिएका थिए ।