दुबई — अमेरिकी राष्ट्रपति डोनाल्ड ट्रम्पले इरानमा प्रहार गर्नका लागि १ हजारवटा मिसाइलहरु तयारी अवस्थामा राखिएको बताएका छन् । उनले आफ्नो हत्या गर्ने प्रयास भएमा इरानमाथि थप हजारौं मिसाइल प्रहार गर्ने चेतावनी दिएका छन् । 

'१००० मिसाइलहरू लक र लोड गरेर इरानतर्फ लक्षित गरिएका छन् । यदि इरानी सरकारले विश्वका धेरै कुनाहरूमा दाबी गरे जस्तै मलाई!—हत्या गर्ने प्रयास गर्‍यो तुरुन्तै अरू हजारौं मिसाइलहरू प्रहार गरिनेछन् । आदेशहरू दिइसकिएको छ, र अमेरिकी सेना इरानका सबै क्षेत्रहरूलाई पूर्ण रूपमा ध्वस्त र नष्ट गर्न तयार, इच्छुक र सक्षम छ,' ट्रम्पले आफ्नो सामाजिक सञ्जाल ट्रुथ सोशलमा लेखेका छन् ।  

इरानमा सर्वोच्च नेता अली खामेनीको अन्त्येष्टिका क्रममा सहभागीहरुले ट्रम्प र इजरायली प्रधानमन्त्री बेन्जामिन नेतन्याहुलाई मार्नुपर्ने नारा लगाएका थिए । त्यस्तै, टर्कीको अंकारामा आयोजित नेटो शिखर सम्मेलनमा बुधबार पत्रकारहरूसँग कुरा गर्दै ट्रम्पले आफुमाथि इरानले हत्याको षड्यन्त्र रचेको दाबी गरेका थिए । 'म इरानको हत्या सूचीमा नम्बर १ मा छु ।  म उनीहरूको हरेक सूचीमा छु । मैले आज बिहान मात्र देखें, म उनीहरूको प्रत्येक सूचीमा परेको छु । र अहिलेसम्म, मलाई लाग्छ म अलिकति भाग्यमानी छु, तर सायद यो अवस्था धेरै लामो समयसम्म टिकिरहँदैन,' उनले भने ।

अमेरिकी सञ्चारमाध्यमहरुमा पनि इरानले ट्रम्पको हत्याको षडयन्‍त्र बुनेको समाचारले प्राथमिकता पाएको छ । द वाल स्ट्रिट जर्नलमा बिहीबार प्रकाशित लेखअनुसार इजरायली गुप्तचरहरुले यस षड्यन्‍त्रबारे ट्रम्पलाई जानकारी गराएका थिए ।

लेखमा यस मामिलाका जानकार व्यक्तिहरूलाई उद्धृत गर्दै भनिएको छ, 'इजरायली अधिकारीहरूले अमेरिकालाई राष्ट्रपतिविरुद्धको नयाँ खतराको बारेमा चेतावनी दिएका थिए । उनीहरूको नजरमा यो यस्तो खतरा हो जसले इरान र अमेरिकाको पहिलेदेखि नै रहेको तनावलाई थप बढाउनेछ ।'

सीएनएनले पनि दुईवटा स्रोतलाई उद्रृत गर्दै ट्रम्पलाई इजरायलले हत्याको जोखिमबारे जानकारी दिएको जनाएको छ । सीएनएनसँगकै कुराकानीमा एक अमेरिकी अधिकारीले भनेका छन्,' यो नयाँ इजरायली गुप्तचर सूचना ट्रम्पको सोचलाई प्रभावित गर्ने एउटा प्रयास पनि हुन सक्छ । किनकि, अहिले इरानविरुद्ध अमेरिकी सैन्य कारबाही बढाउने वा नबढाउने भन्नेबारे ट्रम्पले विचार गरिरहेका छन् ।'

अन्तरिम सम्झौताकै विषयलाई लिएर केही समयअघि इजरायली प्रधानमन्त्री बेन्जामिन नेतन्याहु र ट्रम्पबीचको तनावपूर्ण बनेको थियो । उनीहरूबीच भएको बिर्सनलायक फोन संवाद पनि भयो । त्यस संवादमा लेबनानमाथि अनावश्यक आक्रमण गरेको भन्दै ट्रम्पले नेतान्याहूलाई गाली गरे । उनले नेतान्याहूलाई 'पागल' समेत भनेका थिए । 

१७ जुनमा युद्ध अन्त्य गर्ने अन्तरिम सम्झौतामा हस्ताक्षर गरेका इरान र अमेरिका पछिल्लो एक सातादेखि फेरि आक्रमण र प्रत्याक्रमणमा छन् । जसकारण, यस अन्तरिम सम्झौता संकटमा परेको छ  । 

ट्रम्पले इरानसँगको युद्धविराम समाप्त भइसकेको दाबी गरेका छन् । यद्यपी, इरानले वार्ताको इच्छा देखाएकाले नयाँ चरणमा छलफल हुने पनि उनले बताएका छन् ।

अमेरिकी वरिष्ठ अधिकारीहरूले इरानसँग हर्मुज जलमार्ग खुला गर्नुपर्ने र यस जलमार्ग हुँदै अघि बढ्ने जहाजहरुमाथि आक्रमण नगर्ने सार्वजनिक प्रतिबद्धता जनाउन माग गरेका छन् । इरानले हर्मुज हुँदै जाने जहाजहरुसँग शुल्क उठाउन पाउनुपर्ने र ती जहाजको प्रशासनित व्यवस्थापन रिभोलुशनरी गार्डस् कोर्प्सले गर्ने पुरानै अडान दोर्‍याउँदै आएको छ ।

युद्धपूर्व हर्मुज हुँदै विश्‍वको २० प्रतिशतभन्दा बढी कच्चा तेल र प्राकृतिक ग्याँस पश्चिम एसियाबाट बाहिरिने गरेको थियो । युद्ध सुरू भएलगत्तै यस क्षेत्रमा इरानले गरेको अवरोधले विश्‍वव्यापी इन्धन संकट निम्तिएको छ ।

पटक-पटक निशानामा ट्रम्प

अमेरिकी राष्ट्रपति डोनाल्ड ट्रम्प कम्तिमा ५ पटक निशानामा परिसकेका छन् । पछिल्लोपटक २५ अप्रिल २०२६ मा ह्‍वाइट हाउस करेस्पोन्डेन्टस् एशोसिएसनको आयोजनामा भएको डिनर कार्यक्रममा एक व्यक्तिले गोली चलाएका थिए ।

यस कार्यक्रममा राष्ट्रपति ट्रम्प, प्रथम महिला मेलानिया ट्रम्प, उपराष्ट्रपति जेडी भान्स र मन्त्रिपरिषद्का सदस्यहरु सहभागी थिए । गोली चलेपछि उनीहरुलाई गुप्तचरहरुले उद्धार गरेका थिए । त्यस्तै गोली चलाउने व्यक्तिलाई प्रहरीले नियन्त्रणमा लिएको थियो । 

सेप्टेम्बर २०२४ फ्लोरिडाको वेस्ट पाम बीचमा गल्फ खेलिरहेका बेला ट्रम्पमाथि एक व्यक्तिले हत्या प्रयास गरेका थिए । तर उक्त प्रयास सफल भएन । त्यसपछि ती व्यक्ति राइफल छाडेर भागे । उनलाई त्यही दिन प्रहरीले पक्राउ गर्‍यो । 

जुलाई २०२४ पेन्सिलभेनियाको बटलरमा आयोजित चुनावी र्‍यालीमा गोली चल्यो । ट्रम्पले भाषण गरिरहेका  बेला उनलाई ताकेर गोली हानिएको थियो । ट्रम्पको कानको माथिल्लो भागमा गोली लाग्यो र उनी घाइते भए ।