मस्कले यसअघि पनि स्टार्मरको आलोचना गर्दै आएका छन्। जनवरी २०२५ मा उनले स्टार्मरमाथि सन् २००८ देखि २०१३ सम्म बेलायतका प्रमुख सरकारी अभियोजकका रूपमा कार्यरत रहँदा अधिकांश दक्षिण एसियाली मूलका पुरुषहरू संलग्न बालिका यौन दुर्व्यवहार गिरोहविरुद्ध प्रभावकारी कारबाही गर्न नसकेको आरोप लगाएका थिए।

के हो हत्या घटना?

गत वर्ष १८ वर्षीय हेनरी नोवाकमाथि बेलायतमा छुरा प्रहार भएको थियो। गम्भीर घाइते भएका उनको पछि मृत्यु भएको थियो। घटनापछि प्रहरीले उनलाई हथकडी लगाएको अवस्थामा फेला पारेको थियो।

उनलाई आक्रमण गर्ने व्यक्तिले झुटो रूपमा नोवाकमाथि जातीय विभेदपूर्ण आक्रमण गरेको आरोप लगाएको थियो। नोवाकका हत्यारा एक सिख पुरुषलाई सोमबार अदालतले सजाय सुनाएको थियो।

सजाय सुनाइएपछि सार्वजनिक गरिएको भिडियो फुटेजमा प्रहरीले मृत्युशय्यामा रहेका निर्दोष नोवाकको गुहारलाई बेवास्ता गरेको देखिएको छ। यसले व्यापक आक्रोश उत्पन्न गर्नुका साथै प्रहरीले विभिन्न जातीय समुदायप्रति गर्ने व्यवहारबारे राजनीतिक विवाद पनि चर्काएको छ।

स्टार्मरले उक्त घटनाको व्यवस्थापनबारे प्रहरीले गम्भीर प्रश्नहरूको सामना गर्नुपर्ने बताएका छन्। तर उनले मंगलबार राति भएको हिंसात्मक र अव्यवस्थित प्रदर्शनको निन्दा गर्दै मृत्युलाई तनाव र विभाजन बढाउने माध्यमका रूपमा प्रयोग गर्नु ‘अक्षम्य’ भएको बताएका छन्।