काठमाडौँ — पश्चिम बंगालमा तृणमूल कांग्रेस (टीएमसी)का महासचिव तथा लोकसभाका सांसद अभिषेक बनर्जीमाथि भएको आक्रमणमा प्रहरीले आइतबार पाँच जनालाई पक्राउ गरेको छ । आक्रमण भएको क्षेत्रमा रहेका सीसीटीभी फुटेज र भिडियोका आधारमा रातभर गरिएको छापामा आक्रमणमा संलग्नहरुलाई पक्राउ गरिएको प्रहरीले बताएको छ । 

यता ममता बनर्जीले आफ्ना भतीजा अभिषेकमाथि भएको आक्रमणलाई षड्यन्त्र भएको बताएकी छिन् । उनले भनेकी छिन्, ‘यदि अभिषेकले हेलमेट नलगाएको भए घटनास्थलमै उसको ज्यान जानसक्थ्यो ।’ आक्रमणमा अभिषेकको शरीर रक्ताम्य बनेको उनको भनाइ छ । 

आक्रमणपछि अभिषेकलाई अस्पतालमा भर्ना गरिएको थियो । अस्पतालमा उपचार नगर्नका लागिसमेत दबाब बढाइएको ममताको आरोप छ । 

पश्चिम बंगालको दक्षिण सोनारपुरमा अभिषेक बनर्जीमाथि शनिबार कुटपिट भएको थियो । चुनावपछि भएको हिंसामा पीडित बनेका टीएमसीका कार्यकर्तासँग भेटका लागि उनी त्यहाँ पुगेका थिए । 

भारतीय जनता पार्टीका कार्यकर्ताले उनलाई घेरेर नाराबाजी गर्दै कुटपिट गरेको टीएमसीको आरोप छ । उनीमाथि ढुंगा, जुत्ता र अन्डा प्रहार गर्नुका साथै उनले लगाएको शर्टसमेत च्यातिएको थियो । हेलमेट लगाएर उनलाई उक्त स्थानबाट बाहिर निकालिएको थियो । 

अस्पतालमा भतीजा अभिषेकसँग भेटपछि ममताले पत्रकार सम्मलेन गरेकी छन् । भाजपाका नेता र दक्षिण कोलकाताका डीसीपीका तर्फबाठ चिकित्सक र अस्पताल प्रशासनलाई उपचार नगर्नका लागि धम्की दिइएको ममताले पत्रकार सम्मेलनमा आरोप लगाएकी छन् । 

यस्तै उनले अभिषेकको अवस्था गम्भीर नभएको भए इन्टेसिभ थेरापी युनिट (आईटीयू)मा किन राखियो? भन्दै प्रश्न उठाएकी छन् । फेरि अस्पतालले अचानक घर जान सल्लाह किन दियो भन्दै अस्पताल प्रशासन भाजपाको दबाबमा आएको आरोप लगाएकी छन् । अब अभिषेकको उपचार घरमै हुने पनि उनले जानकारी दिएकी छन् ।