१९९०–९१ को खाडी युद्धमा इराकबाट गरेको प्रत्यक्ष प्रसारणपछि यो संस्था लोकप्रियताको शिखरमा पुग्यो । तत्कालीन राष्ट्रपति जर्ज बुसले एकपटक भनेका थिए, ‘मैले सीआईएभन्दा सीएनएनबाट धेरै जानें ।’ सीएनएनको सफलताले अमेरिकामा अन्य न्युज च्यानल खुल्न प्रेरित गर्‍यो । १९९६ मा टर्नरले सीएनएनसहितका कम्पनीहरू सञ्चालन गर्ने आफ्नो कम्पनी टर्नर ब्रोकास्टिङ सिस्टम टाइम वार्नरलाई बेचेका थिए । त्यसको केही वर्ष उनी उपाध्यक्षका रूपमा कम्पनीमा बसे । त्यसपछि २००३ मा राजिनामा दिए ।

सिन्सिनाटीमा १९३८ मा जन्मिएका टर्नरले १९७० मा आफ्ना बाबुको बिलबोर्डको व्यापार विरासतमा प्राप्त गरेका थिए । त्यसपछि उनले मनोरञ्जन, समाचार, खेलकुदलगायत क्षेत्रमा लगानी गरेर सम्पत्तिलाई बढाए । टर्नर एक विश्वस्तरीय डुंगाचालक खेलाडी पनि थिए । उनले १९७७ मा अमेरिका कप जितेका थिए । उनी ठूला परोपकारी व्यक्तित्व पनि हुन् । उनले संयुक्त राष्ट्रसंघलाई १ अर्ब अमेरिकी डलर दान दिएका थिए । त्यस्तै, विश्वभर महिला, बालबालिका र विपन्नको स्वास्थ्य, मानवीय संकट, शिक्षा, युवा सशक्तीकरणलगायत क्षेत्रमा ठूलो धनराशी खर्च गरे । विश्वका अग्रणी वातावरण अभियन्तामध्ये एक टर्नर अमेरिकामा सबैभन्दा धेरै जमिन भएका व्यक्तिमध्ये एक हुन् ।