डेटानेटका अनुसार टीएमसी १२७ सिटमा र बीजेपीले १४७ सिटमा अग्रता लिइरहेको छ।
काठमाडौँ — भारतका विभिन्न ५ राज्यमा भएको विधानसभा चुनावको मतगणना सुरु भइसकेको छ।
प्रारम्भिक नतिजाअनुसार पश्चिम बंगालमा भारतीय जनता पार्टी (बीजेपी) सत्तारूढ तृणमूल कांग्रेस (टीएमसी) भन्दा अघि देखिएको छ।
डेटानेटका अनुसार टीएमसीले १२७ सिटमा र बीजेपीले १४७ सिटमा अग्रता लिइरहेको छ।
विभिन्न एग्जिट पोलहरूले सत्तारूढ टीएमसी र बीजेपीबीच कडा प्रतिस्पर्धा हुने अनुमान गरेका कारण धेरैजसोको ध्यान पश्चिम बंगालको नतिजातर्फ केन्द्रित छ।
त्यस्तै असममा बीजेपी कांग्रेसभन्दा धेरै अघि छ। प्रारम्भिक नतिजाअनुसार बीजेपी ६६ र कांग्रेस २० सिटमा अगाडि छन्।
तमिलनाडुमा मुख्यमन्त्री एम के स्टालिनको डीएमके ८७ सिटमा अग्रता बनाइरहेको छ भने विपक्षी एआईएडीएमके ३७ सिटमा अघि छ। अभिनेता विजय थलापतिको पार्टी टीभीके २१ सिटमा अगाडि छ।
यस्तै केरलामा कांग्रेस नेतृत्वको युनाइटेड डेमोक्रेटिक फ्रन्ट (यूडीएफ) ५० र सत्तारूढ लेफ्ट डेमोक्रेटिक फ्रन्ट ३९ सिटमा अग्रता लिइरहेका छन्।
असम, केरला र पुडुचेरीमा ९ अप्रिलमा मतदान भएको थियो। त्यस्तै तमिलनाडुमा २३ अप्रिलमा मतदान सम्पन्न भएको थियो।
पश्चिम बंगालमा भने दुई चरणमा २३ र २९ अप्रिलमा मतदान भएको थियो।
