काठमाडौँ — भारतीय सञ्चारमाध्यमहरुका अनुसार भारतको पश्चिम बंगाल र आसाम राज्यमा विधानसभा निर्वाचनमा भारतीय जनता पार्टी (भाजपा) ले बहुमत सिट जितेको छ । पश्चिम बंगालमा २ सय ९४ निर्वाचन क्षेत्रमध्ये २३ र २९ अप्रिलमा दुई चरणमा गरेर २ सय ९३ क्षेत्रमा निर्वाचन सम्पन्न भएको थियो । 

हिन्दूस्तान टाइम्सका अनुसार पश्चिम बंगालमा मतगणना जारी रहदाँ भाजपा १ सय ६० सिटमा विजयी भएको छ । थप ४८ स्थानमा अग्रता बनाएको छ । यस राज्यमा सन् २०२१ मा भाजपाले ७७ सिट जितेको थियो । 

त्यसबेला २ सय १५ सिट जितेको त्रिणमुल कंग्रेस (टिएमसी) ले यसपटकको निर्वाचनमा राम्रो धक्का व्यहोरेको छ । अहिलेसम्मको मतगणनाअनुसार टिएमसी ५३ सिटमा विजयी भएको छ । थप, २६ सिटमा अग्रता बनाएको छ । 

कंग्रेस आई २ स्थानमा विजयी भएको छ भने बाममोर्चाले १ स्थान जितेको छ । आसाममा भाजपाले कुल १ सय २६ सिटमध्ये ८२ सिट जितेको छ । अन्य सहयात्री दलहरुको सिट संख्या समेत जोड्दा भाजपा नेतृत्वको एनडिए गठबन्धनका पक्षमा १ सय २ सिट पुगेको छ । कंग्रेस आईले १९ सिट जितेको छ भने थप २ सिटमा अग्रता बनाएको छ । 

पुडुचेरी प्रदेशमा पनि एनडिए गठबन्धनको बहुमत आएको छ । भारतीय सञ्चारमाध्यम दैनिक भास्करका अनुसार कुल ३० सिटमध्ये १७ सिटमा एनडिए गठबन्धन विजयी भएको हो । यहाँ भाजपाले अधिकांश सिटमा अल इन्डिया एनआर कंग्रेस (एआईएनआरसी) लाई सघाएको थियो । क्षेत्रीय दल एआईएनआरसीले ११ सिट जितेको छ भने थप १ सिटमा अग्रता बनाएको छ । भाजपाले ४ सिट जितेको छ भने एनडिएकै अन्य घटकहरुले २ सिट जितेका छन् ।