अमेरिका — अमेरिकाको क्यालिफोर्निया राज्यको सान फ्रान्ससिस्को सहरले नेपाली नयाँ वर्षलाई औपचारिक मान्यता दिएको छ । 

विश्वकै ठूलो अर्थतन्त्र रहेको मानिने क्यालिफोर्नियाको सान फ्रान्ससिस्कोले नेपाली समुदायप्रति सम्मान व्यक्त गर्दै हरेक वर्ष अप्रिल १४ लाई नेपाली नयाँ वर्षका रूपमा औपचारिक मान्यता दिएको हो ।

सान फ्रान्ससिस्कोका मेयर डानिइल लुरीइलेले औपचारिक पत्र जारी गर्दै हरेक वर्ष अप्रिल १४ लाई नेपाली नयाँ वर्षका रूपमा मान्यता दिइएको घोषणा गरेका छन् । औपचारिक पत्रमा नवीनता, कृतज्ञता र सांस्कृतिक उत्सवको प्रतीकका रुपमा नेपाली नयाँ वर्षलाई मान्यता दिएको उल्लेख छ । नेपाली नयाँ वर्षलाई औपचारिक मान्यता दिएको घोषणा गरेलगत्तै सान फ्रान्ससिस्कोस्थित नेपाली महावाणिज्य दूतावासले आभार व्यक्त गरेको छ । 

अमेरिकास्थित नेपाली महावाणिज्य दूतावासले फेसबुक पेजमार्फत् सान फ्रान्ससिस्कोसहित सान्टा क्लारा, रिमोन्ड र हरकुलर्सले नेपाली समुदायप्रति प्रकट गरेको सम्मानमा कृतज्ञ रहेको उल्लेख गर्दै आभार व्यक्त गरेको हो । घोषणा–पत्रमा बिस्केट जात्रा,  नयाँ वर्ष उत्सवजस्ता परम्परागत गतिविधिले समुदायबीच एकता, खुसी र सांस्कृतिक पहिचानलाई सुदृढ बनाउने दाबी गरिएको छ । घोषणामा सान फ्रान्ससिस्को बे एरियामा बसोबास गर्दै आएका नेपालीले भिन्नभिन्न सांस्कृतिक क्षेत्रमा पुर्‍याएको योगदानको पनि प्रशंसा गरिएको छ ।