काठमाडौँ — इरानका सर्वोच्च नेता आयतोल्लाह अली खामेनेइका छोरा मोज्तबा खामेनेइलाई नयाँ सर्वोच्च नेता चयन भएका छन् ।

अली खामेनेइले १९८९ देखि मृत्यपर्यन्त इरानको नेतृत्व गरेका थिए । २८ फेब्रुअरीमा अमेरिकी आक्रमणमा परेर उनको मृत्यु भएको थियो । 

सर्वोच्च नेताको जाँच र छनोट गर्ने जिम्मेवारी पाएको इरानको ८८ सदस्यीय विशेषज्ञ सभाले सोमबार सटीक र व्यापक छलफलपछि मोज्तबा खामेनेइलाई छनोट गरिएको जनाएको छ । 

१९६९ मा जन्मिएका मोज्तबा अली खामेनीका छ सन्तानमध्ये दोस्रो हुन् । युवावस्थामा उनले १९८० को दशकमा इरान-इराक युद्धको समयमा स्वयंसेवकको रूपमा लडेका थिए । त्यसपछि शिया धर्मशास्त्रको प्रमुख केन्द्र कोममा अध्ययन गरेका थिए ।