काठमाडौँ — नेटो गठबन्धन तथा युरोपेली युनियनको सदस्य स्पेनले आफ्नो भूभागमा रहेका संयुक्त सैन्य पूर्वाधार अमेरिकालाई इरान आक्रमणका लागि प्रयोग गर्न नदिने भएको छ ।

रोटास्थित जलसेनाको स्टेशन र मोरोन एयर बेस स्पेनिस भुभागमा रहेका अमेरिका–स्पेन संयुक्त पूर्वाधार हुन् । यसको कमाण्ड स्पेनिस सैनिकले गर्छन् ।

अमेरिकी राष्ट्रपति डोनाल्ड ट्रम्पले यी पूर्वाधार प्रयोग गर्न नदिए स्पेनसँग सबै व्यापार सम्बन्ध अन्त्य गर्ने चेतावनी दिएका थिए । उनले स्पेनलाई आफ्नो भयानक सहयोगी भनेर आलोचना गरे । तर, स्पेनका प्रधानमन्त्री पेड्रो सान्चेजले आफ्नो देश युद्धविरोधी मान्यतामा अडिग रहेको बताए ।

१० मिनेट लामो टेलिभिजन सन्देशमा सान्चेजले युक्रेन युद्ध, गाजा युद्ध र २० वर्षअघिको इराक युद्धको प्रसङ्ग निकालेर स्पेन सरकारले युद्धलाई सधैं अस्विकार गर्ने बताए ।

'प्रश्न हामी आयतुल्लाको साथमा छौं भन्ने हुँदै होइन । कोही पनि छैन । प्रश्न हामी शान्ति र अन्तर्राष्ट्रिय वैधताका पक्षमा छौ भन्ने हो,' प्रधानमन्त्री निवासबाट दिएको भिडियो सन्देशमा उनले भने ।

उनले इरानी प्रत्याक्रमणको मार खेपेका मध्यपूर्वका देशहरुप्रति आफ्नो ऐक्येबद्धता रहेको बताए । गाजामा इजरायलले गरेको आक्रमणको स्पेनले लामो समयदेखि निन्दा गर्दै आएको छ । उसले यस आक्रमणलाई ‘जातीय नरसंहार’ मान्दै आएको छ । 

यसअघि फ्रान्सले पनि आक्रमणको निन्दा गरेको थियो । तर, मध्यपूर्वको युएईमा इरानले आक्रमण गरेपछि त्यहाँस्थित आफ्नो सैन्य अखडालाई जोगाउन उसले राफेल विमान तैनाथ गरेको छ ।

बेलायतले सुरुमा युद्धमा आफु संलग्न नहुने बताएको थियो । तर, साइप्रसस्थित आफ्ना सैन्य अखडामा इरानले आक्रमण गरेपछि ती अखडा अमेरिकालाई प्रयोग गर्न दिने बताएको छ ।