काठमाडौँ — अमेरिकाले जेनेभामा हुने ईरानसँगको अप्रत्यक्ष वार्ताअघि  मध्यपूर्वमा आफ्नो हवाई र जलसेनाको शक्ति तीव्र रूपमा बढाएको छ । ईरानसँग वार्ता र सैन्य हस्तक्षेप दुबैको विकल्प खुला राखिएको अमेरिकाले बताउँदै आएको छ । 

मंगलबार बेलायतस्थित अमेरिकी वायुसेनाको अखडाबाट केही लडाकु विमानहरूलाई मध्यपूर्व नजिक लगेर राखिएको अमेरिकी सञ्चारमाध्यम सीएनएनले जनाएको छ । सेनालाई तयारी अवस्थामा राख्ने लक्ष्यले इन्धन भर्ने ट्यांकर पनि लगिएको छ । 

अमेरिकी अधिकारीहरूका अनुसार यस क्षेत्रमा थप हवाई रक्षा प्रणाली पठाइँदै छ । फ्लाइट ट्रयाकिङ डाटाअनुसार दर्जनौं अमेरिकी कार्गो विमानहरू विगत केही सातामा अमेरिका हुँदै जोर्डन, बहराइन र साउदी अरबसम्म उडेका थिए । ओपनसोर्स फ्लाइट डाटाले यस क्षेत्रमा २५० भन्दा बढी अमेरिकी सैनिक कार्गो उडेको देखाउँछ । यी विमानमा बन्दोबस्तीका सामानहरु राखिएको अनुमान लगाइएको छ । 

शुक्रबार साँझ धेरैवटा लडाकु विमानले जोर्डनको हवाई क्षेत्रमा प्रवेश गर्न कूटनीतिक अनुमति लिएका थिए । स्याटेलाइट तस्बिरहरूले जनवरी २५ देखि जोर्डनको मुवाफक साल्टी हवाई अखडामा १२ वटा अमेरिकी एफ–१५ लडाकु विमान तैनाथ भएको देखाउँछ । 

राष्ट्रपति डोनाल्ड ट्रम्पले केही हप्तादेखि इरानविरुद्ध सैन्य कारबाहीको सम्भावना कायमै रहेको धम्की दिँदै आएका छन् । शुक्रबार ईरानमा सत्ता परिवर्तन हुँदैछ भनेर सोधिएको प्रश्नको जवाफमा उनले भनेका थिए, ‘यस्तो भए त उत्तम हुन्थ्यों ।’ 

अमेरिकाले वार्तालाई पनि निरन्तरता दिएको छ  गत साता ओमानमा पहिलो चरणको वार्ता भएको थियो । आज ओमानकै मध्यस्थतामा स्विचरल्यान्डको जेनेभामा दोस्रो चरणको वार्ता हुँदैछ । वार्तामा अमेरिकाबाट राष्ट्रपति ट्रम्पका दूत स्टिभ विटकफ र उनका ज्वाइँ जारेड कुशनर रहने अपेक्षा गरिएको छ । इरानको टोलीको नेतृत्व विदेशमन्त्री अब्बास अराग्चीले गरेका छन् ।