काठमाडौँ — अमेरिकी न्याय विभागले यौन अपराधी जेफ्री इप्स्टेनसँग  सम्बन्धित लाखौं नयाँ फाइलहरू सार्वजनिक गरेको छ ।

शुक्रबार तीस लाख पृष्ठ, १ लाख ८० हजार फोटो र  २,००० भिडियोहरू सार्वजनिक गरिएको हो । 

सार्वजनिक फाइलहरूमा जेफ्री इप्स्टेनको  जेल जीवनका विवरणहरू समावेश छन् । यसमा  इप्स्टेनकी सहयोगी गिस्लेन म्याक्सवेलमाथिको अनुसन्धान रेकर्डहरू पनि छ । इप्स्टेनको रिसोर्टमा  नाबालिग किशोरी पुर्‍याउने काम गरेको अभियोग म्याक्सवेलमाथि छ । 

सार्वजनिक फाइलहरुमा इप्स्टेन र हाई–प्रोफाइल व्यक्तिहरूबीचका इमेलहरू पनि समावेश छन् । यौन बेचबिखनको मुद्दामा जेल सजाय बिताइरहेका बेला इप्स्टेनको अगस्ट २०१९ मा मृत्यु भएको थियो । 

अमेरिकी राष्ट्रपति डोनाल्ड ट्रम्पको नाम पनि धेरैवटा इमेलमा उल्लेख छ । तर, उनीसँग प्रत्यक्ष इमेल आदनप्रदान भएको देखिदैंन । ट्रम्पले इप्स्टेनसँग कुनै समय आफ्नो मित्रता रहेको स्विकारेका छन् । तर, वर्षौंअघि नै मित्रता टुटुको र उनको यौन अपराधबारे कुनै जानकारी नभएको बताउँदै आएका छन् । 

एलोन मस्कसँग सम्बन्धित इमेल पनि बाहिरिएको छ । सन् २०१२ को इमेलमा एलोन मस्कले एपस्टाइनलाई सोधेका छन् , ‘ तिम्रो टापुमा रमाइलो पार्टी कुन रात हुनेछ ?’

नोभेम्बर २०१२ मा इप्स्टेनले मस्कसँग सोधका छन्, ‘कतिजनालाई हेलिकप्टरमार्फत टापुमा लैजान आवश्यक छ ।’

जवाफमा मस्कले आफु र आफ्नी तत्कालीन पत्नी तालुलाह रिलमात्रै सहभागी हुने बताएका छन् । अर्को एक इमेलमा मस्कले ‘शान्तिपूर्ण टापुको अनुभव लिन चाहेको’ उल्लेख गरेका छन् । 

इप्स्टेनले आफुलाई टापुमा निम्तो दिएको भएपनि त्यहाँ नगएको दाबी मस्कले गरिरहेका छन् । 

माइक्रोसफ्टका सह–संस्थापक बिल गेट्सको नाम पनि यसमा मुछिएको छ । १८ जुलाई २०१३ मा बिल गेट्सलाई पठाउन दुई इमेलहरू इप्स्टेनले नै ड्राफ्ट गरेको देखिन्छ ।

तर ती इमेल गेट्सलाई पठाइएका थिए कि थिएनन् भन्ने कुरा स्पष्ट छैन । एउटा इमेलमा ‘रूसी युवाहरूसँगको यौन सम्बन्धपछि देखिएका समस्यासँग जुध्न गेट्सका लागि औषधि किन्न परेको उल्लेख छ ।’

बिल गेट्सका  प्रवक्ताले इप्स्टेनले गरेका दाबी झुटो रहेको बताएका छन् । उनले इप्स्टेनसँग गेट्सको कुनै सम्बन्ध नभएको बताएका छन् । जबकी, गत डिसेम्बरमा सार्वजनिक भएको इप्स्टेन फाइनलमा बिल गेट्सका तस्बिर पनि समावेश थिए । 

बेलायती राजकुमारलाई रुसी महिला भेट्न निमन्त्रणा 

इप्स्टेनको सम्बन्ध हाइ–प्रोफाइल व्यक्तिहरुसँग थियो । उनीसँग नजिक सम्बन्ध भएका व्यक्तिमध्ये बेलायतका राजकुमार एन्ड्रयु माउन्टबेटन एक थिए । इप्स्टेनसँगको मित्रताले आलोचित भएका माउन्टबेटनले दरबार त्याग्ने निर्णय केही समयअघि नै लिइसकेका छन् । यद्यपी, उनले कुनै गलत नगरेको बताउँदै आएका छन् । 

अहिले सार्वजनिक गरिएको एउटा फाइलमा ‘द ड्युकलाई २६ वर्षीया रुसी युवतीसँग परिचय गराउने इप्स्टेनको निमन्त्रणा प्रस्ताव पनि एक हो ।  यसमा ‘एचआरएच ड्युक अफ द योर्क केजी’ भनेर लेखिएको छ । यो इमेल सन् २०१० मा पठाइएको देखिन्छ । 

त्यस्तै ४ अप्रिल २००९ मा एन्ड्रयूकी पूर्व पत्नी सारा फर्गुसन र इप्स्टेनबीच इमेला आदनप्रदान भएको देखिन्छ । साराले इप्स्टेनलाई ‘मेरो प्यारो शानदार र विशेष साथी जेफ्री’ भनेर सम्बोधन गरेकी छिन् ।

त्यसैगरी बेलायतका लागि पूर्व अमेरिकी राजदूत लर्ड मन्डेलसन र इप्स्टेनबीचको संवाद पनि सार्वजनिक भएको छ । 

कति सार्वजनिक भयो ?

अमेरिकी न्याय विभागका सहायक महान्यायाधिवक्ता टोड ब्लान्चेले इप्स्टेनसँग पहिचानमा आएका प्रायः  सबै फाइल सार्वजनिक भइसकेको बताएका छन् । जबकी, विपक्षी डेमोक्रेटिक पार्टीका नेताहरुले विभागले अझै २५ लाख कागजात रोकिएको दाबी गरेका छन् ।

‘न्याय विभागले ६० लाख भन्दा बढी सम्भावित उत्तरदायी पृष्ठहरू पहिचान गरेको बताएको थियो । तर समीक्षा र सम्पादन पछि लगभग ३५ लाख मात्र जारी गरिरहेको छ,“डेमोक्रेटिक पार्टीको कंग्रेसम्यान रोह खन्नाले भने,‘यसले बाँकी किन रोकिएको छ भन्ने प्रश्न उठाउँछ ।’