खोपको प्रयोगले पहिलो दुई वर्षमै करिब १२ हजार जनाको ज्यान जोगिएको औषधि तथा स्वास्थ्य उत्पादनसम्बन्धी राष्ट्रिय निकायको दाबी
रासस — पोर्चुगलमा कोभिड–१९ खोप अभियान सुरु भएको पाँच वर्षको अवधिमा तीन करोड २० लाखभन्दा धेरै डोज खोप लगाइएको छ ।
शनिबार सार्वजनिक स्वास्थ्य महानिर्देशनालयले सार्वजनिक गरेको तथ्याङ्कले यो जानकारी दिएको हो ।
पोर्चुगिज सार्वजनिक स्वास्थ्य समाजका अध्यक्ष तथा पूर्व स्वास्थ्य महानिर्देशक फ्रान्सिस्को जोर्जले यस उपलब्धिलाई ‘अत्यन्त सकारात्मक’ भन्दै खोप अभियानलाई निरन्तरता दिनु ‘आधारभूत आवश्यकता’ भएको बताए ।
पोर्चुगलको औषधि तथा स्वास्थ्य उत्पादनसम्बन्धी राष्ट्रिय निकायले सेप्टेम्बर २०२३ मा प्रस्तुत गरेको तथ्याङ्क विश्लेषणमा खोपको प्रयोगले पहिलो दुई वर्षमै करिब १२ हजार जनाको ज्यान जोगिएको उल्लेख छ ।
यसैबीच, पोर्चुगलले यस साता मौसमी रुघाखोकी र कोभिड–१९ विरुद्धको संयुक्त खोप अभियान सुरु गरेको छ । यस अभियानअन्तर्गत २५ लाख जनालाई मौसमी रुघाखोकी र १५ लाख जनालाई कोभिड–१९ विरुद्ध खोप लगाउने लक्ष्य राखिएको छ ।
