राष्ट्रपति जेलेन्स्कीले राजीनामा गरेर छानविनमा सघाउन आग्रह गरेका थिए
एजेन्सी — युक्रेनी राष्ट्रपति भोलोदिमिर जेलेन्स्कीका मुख्य सल्लाहकार एन्ड्री यर्माकले राजीनामा गरेका छन् । आफ्नो घरमा भ्रस्टाचारको अभियोगमा प्रहरीले छापा हानेसँगै उनले राजीनामा दिएका हुन् ।
शुक्रबार युक्रेनका दुई प्रमुख भ्रस्टाचार नियन्त्रण निकायले यर्माकको अपार्टमेन्टमा छापा हानेका थिए । त्यसयता, यर्माकले यस छानविनमा आफ्नो पूर्ण समर्थन रहने बताएका छन् ।
रुस–युक्रेन युद्ध सुरु भएयता उनी जेलेन्स्कीका मुख्य सल्लाहकार तथा निकटका सहयोगी रहदैं आएका छन् । जेलेनेस्कीले केही समयअघि मात्रै अमेरिकी राष्ट्रपति डोनाल्ड ट्रम्पसँगको वार्ताको लागि उनलाई प्रमुख व्यक्तिका रुपमा नियुक्त गरेका थिए ।
तर, पछिल्लो केही सातायता युक्रेनमा भ्रस्टाचार काण्डहरुले जेलेन्स्की सरकार विवादमा तानिएको छ । राष्ट्रपति जेलेन्स्कीले राजीनामा गरेर छानविनमा सघाउन आग्रह गरेपछि यर्माकले राजीनामा गरेका हुन् ।
