एजेन्सी — अमेरिकी राष्ट्रपति डोनाल्ड ट्रम्पले खुकुलो आप्रवासन नीति राष्ट्रिय सुरक्षाको सबैभन्दा ठूलो चुनौती रहेको बताएका छन् । दुई नेशनल गार्डमाथि ह्वाइट हाउस नजिक भएको गोली प्रहारको घटनापछि उनले यस्तो बताएका हुन् । 

‘कुनै पनि देशले आफ्नो अस्तित्वमा यस्तो जोखिम मोल्न सक्दैंन,’ उनले भने । अमेरिकामा रहेका आप्रवासीमाथि सरकारले निगरानी बढाउने संकेत ट्रम्पको यस घोषणाले गरेको अन्तर्राष्ट्रिय सञ्चारमाध्यमहरुको विश्लेषण छ ।

पूर्व राष्ट्रपति जो बाइडेनले अन्य देशका मानिसहरुलाई सहजै अमेरिका छिर्न दिएकाले अवस्था बिग्रिएको आरोप पनि ट्रम्पले लगाएका छन् । उनले अफगानिस्तानलाई पृथ्वीको नर्क भनेर अपमान गरेका छन् ।

त्यस्तै, नेशनल गार्ड आक्रमणको घटनामा कुनै सम्बन्ध नभएका मिन्नेसोटामा बस्ने सोमाली समुदायका मानिसहरुलाई पनि अपमान गरेका छन् । उनले सोमालियालाई कानुन, पानी र सैनिक नभएको देश भनेर उपहास गरे । 

ट्रम्पको घोषणाको केही समयमै अफगानिस्तानमा अध्यागमनसँग सम्बन्धित सबै आवेदन प्रक्रिया स्थगित गर्ने निर्णय अमेरिकी सरकारले गरिसकेको छ । 

तालिवानबाट बच्न अमेरिका छिरेका थिए अभियुक्त 

अमेरिकी राष्ट्रपति कार्यालय ह्वाइटहाउस नजिक तैनाथ भएका दुई नेशनल गार्डमाथि गोली प्रहार गरेको आशंकामा अफगानी नागरिक रहमानुल्लाह लकनवाल अहिले हिरासतमा छन् । २९ वर्षीया रहमानुल्लाह  लकनवाल ‘अपरेशन एलाइज वेलकम’ योजनाअन्तर्गत सेप्टेम्बर २०२१ मा अफगानिस्तानबाट अमेरिका छिरेका थिए ।

अमेरिकी सेनाले अफगानिस्तान छाड्ने समयसीमा समाप्त नहुँदै अगस्टमा तालिवानले काबुल कब्जा गरेको थियो । त्यसयता, विगतमा अमेरिकी सेनालाई सहयोग गरेकाहरु भविष्यमा तालिवानले बदला लिनसक्ने त्रासमा थिए ।

त्यही जोखिमलाई मध्यनजर गरेर ‘अपरेशन एलाइज वेलकम’ योजनाअन्तर्गत ठूलो सख्ंयामा अफगानीहरुलाई अमेरिकामा पुनर्वासको व्यवस्था मिलाइयो । यस कार्यक्रमअन्तर्गत झन्डै ७६ हजार अफगानीहरुलाई अमेरिकाले भिसा दिएको थियो । धेरैजसो मानिसहरु अमेरिकालाई युद्धमा सहयोग गर्ने, कुटनीतिज्ञ, भाषा अनुवादकलगायत थिए । 

यही योजनाअन्तर्गत लकनवाल अमेरिका छिरेर वासिङटन राज्यमा बस्न थाले । उनले अफगानिस्तानमा छँदा सिआईएसहित अमेरिकी सरकारअन्तर्गतका विभिन्न निकायलाई सहयोग गरेको फक्स न्युजले जनाएको छ । 

कन्दहरमा अमेरिकी–अफगानी सेनालाई तालिवानविरुद्धको अपरेशनमा उनले सघाएका थिए ।

एनबीसी न्युजले लकनवालका आफन्तलाई उद्धृत गर्दै उनले १० वर्षसम्म अफगानिस्तानको सेनामा सेवा गरेको जनाएको छ । त्यहीक्रममा कन्दहरमा तैनाथ भएको उनका आफन्तले जनाएका छन् । आफन्तका अनुसार लकनवाल सैनिक सेवामा छँदा घाइते पनि भएका थिए ।

‘अफगानिस्तानबाट बाइडेन प्रशासनको दर्दनाक बहिर्गमनपछि सेप्टेम्बर २०२१ मा अमेरिकाले निकै चाडों आफ्नो सहयोगीहरुलाई उद्धार गरेको ल्याएको थियो । यी र यीजस्ता धेरै व्यक्तिलाई कहिल्यै यहाँ आउन दिन हुने थिएन । हाम्रा नागरिक र कर्मचारीले बाइेडन प्रशासनको यो असफलताको फल झेल्नुपर्ने थिए ,’ सिआईएका निर्देशक जोन र्‍याटक्लिफले फक्स न्युजसँग भने,  ‘त्यसयता, लकनवालमाथि एफबीआईले अनुसन्धान गरिरहेको पनि फक्स न्युजले जनाएको छ ।