बुधबार मेयर निर्वाचित भएलगत्तै मम्दानी सो क्षेत्रकी सांसद् एओसीसँग न्यु योर्कको क्विन्सस्थित ज्याक्सन हाइट्समा अवस्थित लालीगुराँस बिस्ट्रो नामक नेपाली रेष्टुरेन्ट गएका थिए ।
काठमाडौँ — अमेरिकी शहर न्युयोर्कको नगरप्रमुख निर्वाचित भएका भारतीय मूलका चर्चित युवा जोहरान मम्दानीले आफ्नो क्षेत्रकी सांसद् अलेक्जेन्ड्रिया ओकासियो कर्तेज (एओसी) लाई भेट्न नेपाली रेष्टुरेन्ट छानेका छन् ।
बिहीबार एक्समा मम्दानीले म:म, चिकेन तन्दुरी, दुध चिया, आलु लगायत परिकार खाँदै गफ गरिरहेको तस्बिर पोस्ट गरेका छन् । ‘मेयर निर्वाचित भएको पहिलो दिन अत्यन्तै व्यस्त रह्यो: एकाबिहानै अन्तर्वार्ता, घोषणा, बैठक र थप कुराकानी भए,’ उनले लेखेका छन्, ‘तर, यी सबैमाझ महत्वपूर्ण चाहिँ ज्याक्सन हाइट्सस्थित लालीगुराँस बिस्ट्रोमा हाम्री सांसद एओसीसँगको लन्च बैठक रह्यो ।’
सन् २००८ मा खुलेको सो रेस्टुरेन्ट नेपाली बाहुल्य क्षेत्र ज्याक्सन हाइट्समा नेपाली समुदायमाझ चर्चित छ । आफ्नो चुनाव प्रचार अभियानका क्रममा पनि मम्मदानी र एओसी दुवैले न्यु योर्कका नेपाली समुदायलाई लक्षित गर्दै नेपाली भाषामा पोस्ट गर्ने गरेका थिए ।
