काठमाडौँ — पेरिसको विश्वप्रसिद्ध लुभ्र संग्रहालयमा भएको चोरीमा संलग्न भएको आरोपमा दुई जना पक्राउ परेका छन् ।

फ्रान्सेली अखबार ले पेरिसियनका अनुसार शनिबार साँझ दुई जना पक्राउ परेका हुन् । प्रहरीलाई उदृत गर्दै ले पेरिसियनले गत १९ अक्टोबरमा भएको चोरीमा संलग्न भएको आरोपमा ३० वर्षीय दुई युवकलाई राजधानी बाहिर सेन सेन्ट-डेनिसबाट पक्राउ गरेको हो । 

फ्रान्सको अर्को सञ्चारमाध्यम पेरिस म्याचका अनुसार, आरोपीहरु विदेश भाग्दै गर्दा एयरपोर्टबाट पक्राउ परेका हुन् । पक्राउ परेका एक पुरुष अल्जेरिया जाने तयारीमा थिए भने अर्का व्यक्ति माली जाने तयारीमा थिए । उनीहरु स्थानीय समय अनुसार शनिबार राति करिब १० बजे पेरिस, चार्ल्स डे गाउल एयरपोर्टबाट पक्राउ परेका हुन् । 

विश्वकै सुरक्षित मानिने यो संग्राहलय चोरीमा चार जना संलग्न रहेको प्रारम्भिक अनुमान छ । चोरीमा संलग्नहरूको अनुसन्धानका लागि शनिबार मात्रै १ सय ५० भन्दा बढी डीएनए र 'फिंगरप्रिन्ट'(औंठाछाप)को नमुना संकलन गरिएको थियो । 

गत अक्टोबर १९ मा नेपोलियन तृतीयकी पत्नी युजेनी डे मोन्टिजोका लागि सन् १८५५ मा बनाइएका बहुमूल्य रत्नहरूले जडित युजेनी क्राउन (टियारा), एक हार र एउटा ब्रोचसहित नौ बहुमूल्य रत्नहरू चोरी भएको थियो । साम्राज्ञी युजेनीको मुकुट २ सय १२ मोती र करिब २ हजार हीराले जडित थियो । यस गहनाको सेटलाई अत्यन्तै बहुमूल्य मानिन्छ ।

लुभ्र संग्रहालय विश्वको सबैभन्दा धेरै भ्रमण गरिएको संग्रहालय हो । यसमा मोनालिसा, भेनस डे मिलो जस्ता बहुमूल्य कलाकृतिहरूसहित करिब ३८०,००० ऐतिहासिक वस्तुहरू संग्रहित छन् ।