लिमा — पेरुको एक अदालतले पूर्वराष्ट्रपति अलेजान्द्रो टोलेडोलाई ‘मनी लाउन्ड्रिङ’ को आरोपमा १३ वर्ष ४ महिनाको जेल सजाय सुनाएको छ । व्यापक भ्रष्टाचार गरेको अभियोगमा उनलाई यसअघि पनि जेल सजाय तोकिएको अल जजिराले जनाएको छ ।

२०२४ अक्टोबरमा पनि उनलाई सार्वजनिक निर्माण सम्झौता प्रदान गरेको बदलामा ब्राजिलको जायन्ट ओडेब्रेक्टबाट ३ करोड ५० लाख डलर घूस लिएकामा दोषी ठहर गर्दै २० वर्ष ६ महिनाको जेल सजाय सुनाइएको थियो । अब उनले दुवै सजाय एकैसाथ भोग्नुपर्नेछ ।

सन् २००१ देखि २००६ सम्म राष्ट्रपति रहेका टोलेडोलाई अचल सम्पत्ति हत्याउने गरी ओडेब्रेक्टबाट घूसको रकम प्रयोग गरेको अभियोगमा दोषी ठहर गरिएको हो । अभियोजनकर्ताका अनुसार टोलेडो र उनकी श्रीमतीले ५१ लाख डलर लिमा नजिकैको अपस्केल घर र कार्यालय किन्न तथा अन्य दुई सम्पत्तिमा धितो तिर्न प्रयोग गरेका थिए । जसका लागि टोलेडोले अवैध रूपमा ‘मनी लाउन्ड्रिङ’ गर्न खोजेको अल जजिराको रिपोर्टमा उल्लेख छ ।