तेल अविवको होस्टेजेस स्क्वायरमा युद्ध रोक्न र बन्धकको रिहाइको माग गर्दै ठूलो प्रदर्शन भएको छ।
काठमाडौँ — गाजामा युद्ध अन्त्य र हमासको कब्जामा रहेका इजरायली बन्धकको रिहाइका लागि इजरायली नागरिक सडकमा उत्रिएका छन् ।
उनीहरुले गाजामा जारी युद्ध रोक्न र इजरायली बन्धकको रिहाइको सम्झौता गर्न माग गर्दै विरोध प्रदर्शन गरेका हुन् ।
आइतबार राति तेल अविवको ‘होस्टेजेस स्क्वायर’ मा ठूलो भीड जम्मा भएको थियो । एक दिवसीय राष्ट्रिय हड्तालका कारण केही क्षेत्रमा सडक प्रभावित हुनुका साथै विश्वविद्यालय पनि बन्द भएका छन् ।
यसै क्रममा दिनभर प्रदर्शन गर्ने करिब ४० जनालाई पक्राउसमेत गरिएको छ ।
विरोध प्रदर्शनका आयोजकले गाजा शहरमा नियन्त्रण गर्ने योजनाका कारण हमाससँग रहेका बन्धक २० जनाको ज्यान जाने खतरा रहेको बताएको छ ।
प्रदर्शनको आलोचना
इजरायली प्रधानमन्त्री बेन्जामिन नेतान्याहुले विरोध प्रदर्शनको आलोचना गरेका छन् । उनले भनेका छन्, ‘इजरायलभित्रै हुने यस्ता प्रदर्शनले हमासको मनोबल झन बढ्नेछ र बन्धकको रिहाईमा ढिलाई हुनेछ ।’
७ अक्टुबर २०२३ मा इजरायलमा पर्व मनाइरहेका नागरिकलाई लक्षित गरी हमासले आक्रमण गरेयता गाजामा युद्धको सुरुआत भएको हो । उक्त आक्रमणमा इजरायलमा १२ सय जना मारिएका थिए । जसमा १० जना नेपाली विद्यार्थी पनि थिए ।
यस्तै उक्त आक्रमणपछि हमासले एक नेपालीसहित २५१ जनालाई बन्धक बनाएर गाजामा लिएका थिए । जसमध्ये अब करिब २० जना मात्र जिवित रहेको बताइएको छ । हमासद्वारा नियन्त्रित स्वास्थ्य मन्त्रालयका अनुसार इजरायलद्वारा गाजामा गरिएको आक्रमणमा परी हालसम्म ६१ हजारभन्दा बढी प्यालेस्टिनी मारिएका छन् ।
