एससीओ शिखर सम्मेलनमा सहभागी हुने
What you should know
काठमाडौँ — भारतीय प्रधानमन्त्री मोदी प्रधानमन्त्री नरेन्द्र मोदी चीन भ्रमणमा जाने भएका छन् । भारतीय सञ्चामाध्यमहरुका अनुसार अगस्ट ३१ देखि सेप्टेम्बर १ सम्म तियानजिन सहरमा हुने संघाई शिखर सम्मेलन (एससीओ) मा सहभागी हुन मोदी चीन लागेका हुन् ।
सन् २०२० मा भएको गलवान झडपपछि मोदीको यो पहिलो बेइजिङ भ्रमण हुनेछ । सन् २०२० मा पूर्वी लद्दाखको लाइन अफ एक्चुअल कन्ट्रोल (एलएसी) मा भारतीय र चिनियाँ सैनिकबीच झडप भएको थियो । झडपमा २० भारतीय र ४ चिनियाँ सैनिकको मृत्यु भएको थियो । उक्त घटनापछि दुवै मुलुकबीचको सम्बन्धमा चिसोपन आएको थियो ।
मोदीले २३ अक्टोबर २०२४ मा रूसको कजान भएको ब्रिक्स शिखर सम्मेलनमा चिनियाँ राष्ट्रपति सी जिनपिङलाई भेटेका थिए । दुवैबीच साइडलाइन भेट भएको थियो । लद्दाख झडपको पाँच वर्षपछि मोदी र सीबीच भएको त्यो पहिलो औपचारिक भेट थियो । उक्त भेटपछि दुई छिमेकीबीच सम्बन्ध सुधारको प्रयास सुरु भएको थियो । लगत्तै दुवै पक्षले लद्दाखका दुई मुख्य क्षेत्र डेप्साङ र डेमचोकमा सेना फिर्ता बोलाउने योजना घोषणा गरेका थिए ।
गत जुलाईको अन्तिम साता एससीओको विदेशमन्त्रीहरुको सम्मेलनमा सहभागी हुन भारतीय विदेशमन्त्री एस जयशंकर चीन पुगेका थिए । गलवान झडपपछि भारतीय विदेशमन्त्रीको पनि त्यो पहिलो बेइजिङ भ्रमण थियो । त्यसक्रममा जयशंकरले चिनियाँ समकक्षीका अतिरिक्त रक्षामन्त्री र राष्ट्रिय सुरक्षा सल्लाहकारसँग पनि भेटवार्ता गरेका थिए ।
भारतीय रक्षामन्त्री राजनाथ सिंहको चीन भ्रमणको अर्को महिना जयशंकरको बेइजिङ पुगेका थिए । सिंह चीनकै किङदाओमा जेठमा एससीओका रक्षामन्त्रीहरूको बैठकमा सहभागी भएका थिए । भारतीय रक्षामन्त्री सिंहले हस्ताक्षर गर्न अस्वीकार गरेपछि बैठक संयुक्त वक्तव्यबिना नै सम्पन्न भएको थियो । तर, दुवै देशले सम्बन्धको प्रयासलाई भने जारी राखेका थिए । यसबीच चीनले भारतीय नागरिकका लागि मानसरोवर यात्रासमेत खुला गरेको छ । गलवान झडप र कोरोना महामारीका कारण देखाएर चीनले भारतीय नागरिकका लागि मानसरोवार यात्रामा रोक लगाएको थियो ।
