अमेरिकी राष्ट्रपति डोनाल्ड ट्रम्पले रुसलाई युद्ध अन्त्य गर्न नयाँ समयसीमा तोकेपछि गरिएको हमलाका कारण युक्रेनसँगको शान्ति प्रक्रिया जटिल बन्दै
What you should know
किभ — रुसले युक्रेनका विभिन्न क्षेत्रमा मंगलबार गरेको भीषण हवाई हमलामा कम्तीमा २५ जनाको ज्यान गएको छ । मृतकमध्ये २३ वर्षीया गर्भवती महिला र १६ जना कैदीसमेत परेका अन्तर्राष्ट्रिय सञ्चारमाध्यमले जनाएका छन् । उक्त हमलाको केही घण्टापछि नै रुसले शान्ति प्रक्रियाप्रति आफू प्रतिबद्ध रहेको उल्लेख गरेको छ ।
युक्रेनी राष्ट्रपति भोलोदिमिर जेलेन्स्कीले दक्षिणी जापोरिझिया क्षेत्रको एक कैदीगृहमा जानाजान आक्रमण गरिएको आरोप लगाएका छन् । सो आक्रमणमा १६ कैदीको ज्यान गएको र ४० भन्दा बढी घाइते भएको बताइएको छ । ‘यो योजनाबद्ध हमला हो, कुनै दुर्घटनावश भएको होइन । रुसले त्यहाँ सर्वसाधारण कैदी रहेको कुरा थाहा नपाउने कुरा सम्भव नै छैन,’ राष्ट्रपति जेलेन्स्कीले सामाजिक सञ्जालमा लेख्दै हमलाको चर्को विरोध गरेका छन् । तर रुसी प्रवक्ता दिमित्री पेस्कोभले भने जेलेन्स्कीको आरोपको खण्डन गर्दै ‘रुसी सेनाले कहिल्यै सर्वसाधारणलाई लक्षित नगर्ने’ दाबी गरेका छन् ।
युक्रेनी वायुसेनाले जनाएअनुसार, रुसले ३७ ड्रोन र दुई मिसाइल प्रक्षेपण गरेको थियो, जसमध्ये ३२ ड्रोनलाई निस्तेज पारिएको दाबी गरिएको छ । यद्यपि, डनिप्रो क्षेत्रमा रहेको क्याम्यान्स्के सहरको एक अस्पतालमा गरिएको हमलामा २३ वर्षीया गर्भवती महिला डायनासहित तीन जनाको मृत्यु भएको राष्ट्रपति जेलेन्स्कीले बताएका छन् । खार्किभ क्षेत्रमा गरिएका छुट्टाछुट्टै हमलामा ६ जनाको मृत्यु भएको छ ।
यी हमलाहरू अमेरिकी राष्ट्रपति डोनाल्ड ट्रम्पले रुसलाई युद्ध अन्त्य गर्न नयाँ समयसीमा तोकेपछि सुरु भएको हो । यदि सो समयसीमाभित्र रुसले आक्रमण रोक्न अस्वीकार गरेमा अमेरिकाले रुसमाथि कडा आर्थिक प्रतिबन्ध लागू गर्ने चेतावनी दिएका थिए । युक्रेनी मानवअधिकार आयुक्त द्मित्रो लुबिनेत्सले जेलमा गरिएको उक्त हमलालाई ‘युद्ध अपराध’ को संज्ञा दिँदै भनेका छन्, ‘कैदीले पनि जीवन र सुरक्षाको अधिकार गुमाउँदैनन् ।’
रुस–युक्रेन युद्ध चौथो वर्षमा प्रवेश गरिरहँदा, रुसी सेनाले युक्रेनका नयाँ गाउँहरू कब्जामा लिएको दाबी गरेको छ । युक्रेनले यथासम्भव आक्रमण रोक्ने प्रयास गरिरहेको छ, यद्यपि रुसी फौज केही नयाँ क्षेत्रमा समेत अघि बढेको देखिएको छ ।
