काठमाडौँ — भारतका उपराष्ट्रपति जगदीप धनखडले पदबाट राजीनामा दिएका छन् । सोमबार साँझ स्वास्थ्यको कारण देखाउँदै उनले राजीनामा दिएका हुन् । राष्ट्रपति द्रौपदी मुर्मुलाई पत्र लेख्दै उनले स्वास्थ्य अवस्था र चिकित्सकको सल्लाहबमोजिम आफूले पदबाट राजीनामा दिएको उल्लेख गरेका छन् । 

धनखडको कार्यकाल अगस्ट २०२७ मा मात्र पूरा हुँदै थियो । उनले कार्यकाल सकिनु २ वर्षअघि नै राजीनामा दिएका हुन् । जनता दल, कांग्रेस हुँदै भाजपामा उनी विभिन्न भूमिका निर्वाह गर्दै देशको दोस्रो सर्वोच्च पदमा पुगेका हुन् । 

तर उनको राजीनामाको 'टाइमिङ' लाई लिएर विभिन्न अड्कलबाजी भइरहेका छन् । खासगरी विपक्षी दलहरूले उनको राजीनामामाथि गम्भीर प्रश्न उठाएका छन् । भारतमा उपराष्ट्रपति राज्यसभा सभापतिसमेत हुन्छन् । राज्यसभा सभापतिका रूपमा धनखड्को विपक्षी दलहरूसँग प्राय: टकरावको स्थिति नै रह्यो । यहाँसम्म कि गत वर्षको डिसेम्बरमा विपक्षी गठबन्धन 'इन्डिया' ले उनीविरुद्ध अविश्वास प्रस्तावको नोटिस दिएको थियो ।

कल दोपहर 12:30 बजे श्री जगदीप धनखड़ ने राज्यसभा की कार्य मंत्रणा समिति (BAC) की अध्यक्षता की। इस बैठक में सदन के नेता जेपी नड्डा और संसदीय कार्य मंत्री किरेन रिजिजू समेत ज़्यादातर सदस्य मौजूद थे। थोड़ी देर की चर्चा के बाद तय हुआ कि समिति की अगली बैठक शाम 4:30 बजे फिर से होगी।…

— Jairam Ramesh (@Jairam_Ramesh) July 22, 2025

धनखडको राजीनामापछि कांग्रेस नेता जयराम रमेशले सामाजिक सञ्जालमा लेखेका छन्, 'उपराष्ट्रपतिको अचानक राजीनामा आउनु अचम्म त छँदैछ, त्यति नै बुझ्न नसकिने पनि । म आज साँझ ५ बजेतिर अन्य सांसदहरूसहित उहाँसँगै थिएँ । साँझ साढे ७ बजे पनि उहाँसँग फोनमा कुराकानी भएको थियो ।' रमेशले धनखडले स्वास्थ्यलाई प्राथमिकता दिनु स्वाभाविक भएको उल्लेख गर्दै अप्रत्याशित राजीनामापछि 'धेरै चिज पाकिरहेको' आशंका गरेका छन् ।

राजीनामा दिनुअघि धनखडले केही मन्त्रीहरूलाई पनि भेटेका थिए । लल्लनटपका अनुसार उनले मोदी सरकारका शीर्ष मन्त्रीहरूसँग भेटघाट गरेका थिए । मिडिया रिपोर्टहरूका अनुसार भन्दै लल्लनटपले धनखडले रक्षामन्त्री राजनाथ सिंह, गृहमन्त्री अमित शाह र यातायातमन्त्री नितिन गडकरीसँग भेटेको उल्लेख गरेको छ । ती भेट संसद् परिसरमै भएका थिए । तीन मन्त्री अलग्गै पनि बैठक बसे । सोमबार साँझै रक्षामन्त्री सिंहको कार्यकक्षमा पनि भाजपा सांसदहरूको ताँती लागेको थियो । लल्लनटप लेख्छन्, 'एक जना भाजपा सांसदले नाम नछाप्ने सर्तमा भने, त्यहाँ हामीलाई खालि कागजमा हस्ताक्षर गराइयो ।'

जति समय उनी उपराष्ट्रपतिका रूपमा रहे, 'पोलराइजिङ फिगर' का रूपमा रहे । उनी खुलेरै सनातन र संविधानको कुरा गर्थे । उनले ११ अगस्ट २०२२ मा उपराष्ट्रपति पदको शपथ ग्रहण गरेका थिए । त्यसअघि उनी पश्चिम बंगालका राज्यपाल थिए । उनी जुलाई २०१९ मा राज्यपाल नियुक्त भएका थिए । राज्यपालका रूपमा पनि पश्चिम बंगालकी मुख्यमन्त्री ममता बनर्जीसँग उनी टकरावमै थिए । पछिल्लो समय पनि विपक्षी दलहरूको आरोप छ, 'जगदीप धनखडले पक्षपातपूर्ण ढंगले राज्यसभा बैठक सञ्चालन गरिरहेका थिए ।'