काठमाडौँ — बंगलादेशको राजधानी ढाकामा बंगलादेशी वायु सेनाको एफ-सेभेन जेट विमान दुर्घटना हुँदा कम्तीमा १९ जनाको मृत्यु भएको छ । सोमबार दिउँसो ढाकाको दियाबारी क्षेत्रमा रहेको माइलस्टोन क्याम्पस परिसरमा बंगलादेशी सेनाको जेट विमान खसेको हो । 

बंगलादेशी सञ्चार माध्यम द डेली स्टारका अनुसार दुर्घटनामा कम्तीमा १ सय ६४ जना घाइते भएका छन् ।  स्थानीय समयअनुसार दिउँसो १:०६ मा उडेको उक्त विमान साढे १ मा दुर्घटनामा परेको थियो । दुर्घटनामा उक्त विमानका पाइलट फ्लाइट लेफ्टिनेन्ट तौकिर इस्लाम सागरको समेत मृत्यु भएको छ ।

सेनाको इन्टर सर्भिस पब्लिक रिलेसन्स(आईएसपीआर) का अनुसार प्रशिक्षणका क्रममा क्याम्पस परिसरमा जहाज दुर्घटनामा परेको हो । मृत्यु हुनेहरूमा अधिकांश क्याम्पसका विद्यार्थी रहेका छन् । घाइतेहरूलाई विभिन्न अस्पतालमा भर्ना गरिएको छ । छुट्टी हुने बेलामा विमान खसेको माइलस्टोन क्याम्सका प्राध्यापकहरूले जनाएका छन् ।