बेइजिङ — चीनका लागि नेपाली राजदूत डा.कृष्णप्रसाद ओलीले नेपाल दक्षिण एसियामै वैदेशिक लगानीका लागि उपयुक्त गन्तव्य भएको बताएका छन् ।

मंगलबार साँझ बेइजिङस्थित नेपाली दूतावासमा दर्जनौं चिनियाँ लगानीकर्ताहरू भेला पार्दै राजदूत ओलीले अन्तर्राष्ट्रिय मुद्रा कोष, विश्व बैंकको प्रतिवेदन र अन्तर्राष्ट्रिय रेटिङ एजेन्सीले गरेको क्रेडिट रेटिङका अनुसार नेपाल दक्षिण एसियाकै सबैभन्दा अनुकूल व्यावसायिक वातावरणयुक्त मुलुक भएको ठोकुवा गरे ।

‘उदाउँदो नेपाल: लगानीका अवसरहरू’ विषयक अन्तर्क्रियामा चाइनिज ओभरसिज डेभलपमेन्ट एसोसियसन (कोडा), अरनिको बेइजिङ इन्टरनेश्नल सप्लाई चेन म्यानेजमेन्ट कम्पनीसहित विभिन्न उद्यमीहरू कार्यक्रममा सहभागी थिए । उनीहरु यस कार्यक्रमका सहआयोजक पनि थिए ।

नेपाल र चीनबीच कूटनीतिक सम्बन्ध स्थापना भएको ७० औं वर्षगाँठका साथै नेपालको राष्ट्रिय आकांक्षा 'समृद्ध नेपाल, सुखी नेपाली' लाई साकार पार्न आर्थिक वृद्धि, त्यसका लागि विदेशी लगानी र अझ चिनियाँ सहयोग आवश्यक रहेकोमा राजदूत ओलीले जोड दिए । 

उनले भने, ‘हाम्रो विकास लक्ष्यहरू प्राप्त गर्न मित्रवत छिमेकी चीनबाट नेपालको ऊर्जा, सूचना प्रविधि, पूर्वाधार, खानी, कृषि, स्वास्थ्य र शिक्षा क्षेत्रमा लगानी र प्रविधि हस्तान्तरण अपरिहार्य छ ।’

नेपाल सरकारले व्यवसाय-मैत्री वातावरण सिर्जना गर्न कानुनी, नियामक र सञ्चालन उपायहरूमा विभिन्न सुधारहरू गरेको र प्रधानमन्त्रीकै अध्यक्षतामा रहनेगरी नेपाल लगानी बोर्ड स्थापना गरेको भन्दै राजदूत ओलीले ट्रान्स-हिमालय बहुआयामिक कनेक्टिभिटी नेटवर्क, चीन-नेपाल मैत्री औद्योगिक पार्क, कृषि-औद्योगिक प्रदर्शन पार्क, अन्तर्राष्ट्रिय प्रदर्शनी केन्द्रको विकाससँगै बलियो कनेक्टिभिटी र पूर्वाधारको विकासका कारण नेपाल द्विपक्षीय मात्र नभई व्यापार र लगानीको लागि क्षेत्रीय हब हुने दाबी गरे ।

कोडाका अध्यक्ष ह चनवेईले नेपाल र चीनले साझा नियतिका साझेदार मुलुक भएकाले एकअर्काको समृद्धिका लागि सहकार्य गर्नसकिने बताए । पछिल्लो समय चिनियाँ सामानहरू इलेक्ट्रोनिक्स, मेडिकल डिभाइस, सफा-ऊर्जा उत्पादन लगायतको निर्यातले नेपालमा देखिनेगरी स्थान पाएको उनले सुनाए । उनले भने, ‘आपसी सहकार्यका यी सानै उपलब्धीले पनि द्विपक्षीय व्यापार अर्थतन्त्र मात्रै होइन, बृहत् कनेक्टिभिटी परियोजनाका लागि आधार तयार पारेको छ ।’

उद्योग वाणिज्य तथा आपूर्तिमन्त्री दामोदर भण्डारीले भिडियो सन्देश पठाउँदै चिनियाँ लगानीकर्ताहरूलाई नेपाल आउन स्वागत गरे । सभाहलमा ‘सिङ्गिङ बाउल’ ठोकेर आफ्नो भाषण शुरू गरेका अरनिको बेइजिङ इन्टरनेश्नल सप्लाई चेन म्यानेजमेन्ट कम्पनीका कार्यकारी निर्देशक चाइ वनमिङले नेपालबाट आएको विशेष उत्पादनको रुपमा परिचय दिए । 

उनले नेपालमा आफ्नो कम्पनीले लगानी गरेका उद्यम व्यवसायको बारेमा चर्चा गर्दै नेपालप्रतिको चिनियाँको धारणा परिवर्तन हुनुपर्ने सुझाए। आफ्नो अध्ययनमा नेपालीहरूको क्रयशक्ति बढ्दै गएको उनको ठहर थियो । उनले भने, ‘नेपाल त्यति गरिब मुलुक होइन, जति हामी चिनियाँहरू सोचिरहेका छौं।’

दूतवासकी इकोनोमिक मिनिस्टर पार्वती अर्यालले नेपालमा लगानीका संभावनाबारे एउटा प्रस्तुती दिएकी थिइन् । उनले वैदेशिक लगानी भित्र्याउनका लागि नेपालले हरसंभव प्रयासहरू गरिरहेको र उपयुक्त वातावरण निर्माणदेखि नीतिहरू तर्जुमा गरिरहेको बताइन् ।