काठमाडौँ — इजरायल र इरानबीचको द्वन्द्व चर्किंदै जाँदा इरानमा अध्ययनरत भारतीय विद्यार्थीहरू राजधानी तेहरानबाट अन्य सहरतर्फ सर्न थालेका छन् । सीएनएनका अनुसार केही भारतीय विद्यार्थी भने इरानको सीमावर्ती देश अर्मेनिया जाँदैछन् ।
भारतका खासगरी जम्मु र कश्मीरका विद्यार्थी इरानमा चिकित्सा शिक्षा अध्ययनरत छन् । भारतीय सञ्चारमाध्यम हिन्दुस्तान टाइम्सका अनुसार इरानमा ४ हजार भारतीय छन् । जसमध्ये आधा विद्यार्थी रहेको अनुमान छ ।
गत शुक्रबार इजरायलको आक्रमण सुरु गरेपछि इरानको हवाई क्षेत्र बन्द गरिएको छ । त्यसैले पनि इरान छाड्न चाहने विदेशी नागरिक स्थलमार्ग प्रयोग गरेर लामो यात्रा गर्न वाध्य छन् ।
भारतीय विदेश मन्त्रालयले विज्ञप्ति जारी गरेर तेहरानस्थित भारतीय दूतावासले इरानको सुरक्षा स्थिति निरन्तर निगरानी गरिरहेकोे जनाएको छ ।
विदेश मन्त्रालयले विद्यार्थीलाई इरानभित्र सुरक्षित स्थानहरूमा सारिएको र नयाँ सम्भावित विकल्पहरूको समेत अध्ययन भइरहेको जनाएको छ ।
