काठमाडौँ — शनिबार रातिदेखि अशान्त बनेको पूर्वोत्तर भारतको मणिपुर राज्यमा सोमबार पनि प्रदर्शन कायमै छ । भारतीय सञ्चारमाध्यम दि हिन्दुका अनुसार आइतबार राति निषेधाज्ञा उल्लंघन गर्दै प्रदर्शनकारीले सरकारी भवनजलाउनेदेखि सुरक्षाकर्मीसँग भीडन्तसम्मका घटना भए । उनीहरुले राति मसाल जुलससमेत निकालेका थिए ।

शनिबार राति मैतेई जातिको स्वयंसेवक संगठन 'अरम्बाई टेंगोल-एटी' का एक प्रमुख नेता कनान सिंहसहित अन्य पाँच नेतालाई पक्राउ गरेपछि मणिपुरमा प्रदर्शन सुरु भएको हो । प्रदर्शन सुरु भएपछि प्रशासनले  शनिबार रातिदेखि लागू हुनेगरी राज्यका पाँच जिल्लामा पाँच दिनका लागि इन्टरनेट सेवा बन्द गरेको छ ।  एउटा जिल्लामा कर्फ्यु र अन्य चार वटा जिल्लामा मानिसहरूलाई भेला हुन र प्रदर्शन गर्नमा रोक लगाउने गरी निषेधाज्ञा जारी गरेको छ ।