भ्रमणका क्रममा ट्रम्पले साउदी अरबसँग १ खर्ब ४२ अर्ब डलरको रक्षा सम्झौता गरे । अमेरिकी राष्ट्रपति कार्यालय ह्वाइट हाउसले सम्झौता अनुसार साउदी अरबले एक दर्जनभन्दा बढी अमेरिकी रक्षा फर्महरूबाट अत्याधुनिक युद्ध लडाइँसम्बन्धी उपकरण तथा सेवाहरू प्राप्त गर्नेछ ।

सम्झौतामा वायु सेनाको उन्नति र अन्तरिक्ष क्षमता, हवाई तथा क्षेप्यास्त्र रक्षा, समुद्री तथा तटीय सुरक्षा, सीमा सुरक्षा र स्थल सेनाको आधुनिकीकरण तथा सूचना तथा सञ्चार प्रणालीको स्तरोन्नति लगायतका विषय समावेश छन् । त्यस्तै दुई देशबीच ऊर्जा, खनिज स्रोत, संक्रामक रोगसम्बन्धी सहयोग लगायत विषयमा पनि सहमति भएको छ ।

त्यस्तै, भ्रमणकै क्रममा सिरियामाथिको अमेरिकी प्रतिबन्ध हटाउने घोषणा गरेका ट्रम्पले सिरियाका अन्तरिम राष्ट्रपति अहमद अल-शारासँग भेटवार्ता गरेका छन् । भेटका क्रममा ट्रम्पले अल-शारालाई इजरायलसँग सम्बन्ध सुधार्ने अब्राहम सम्झौतामा हस्ताक्षर गर्न र सिरियाली भूभागबाट सबै विदेशी आतंकवादीलाई लखेट्न सुझाव दिएका छन् ।