अमेरिका — अमेरिकाले सन् २०२५ को सुरुवाती चार महिनामा ६५ हजार ६ सय ८२ आप्रवासीलाई निष्कासन गरेको छ । गैरकानुनी रूपमा बस्दै आएका, आपराधिक गतिविधिमा संलग्न रहेका र अदालतबाट निष्कासनको आदेश पाइसकेकालाई यूएस इमिग्रेसन एन्ड कस्टम इन्फोर्समेन्ट (आइस) ले निष्कासन गरेको हो ।

आइसको तथ्यांकअनुसार गत जनवरीदेखि अप्रिलसम्म निष्कासन गरिएकामध्ये ७९ नेपाली र ४ जना भुटानी शरणार्थी छन् । १ करोड १० लाख गैरकानुनी आप्रवासी रहेको अमेरिकामा हालसम्म निष्कासित भएकाको संख्या ०.५९ प्रतिशत मात्र हो । गैरकानुनी आप्रवासी निष्कासनसँगै उनीहरूलाई रोजगारी दिने व्यवसायीलाई समेत आइसले पक्राउ गरेको छ ।

आइसका अनुसार पक्राउ परेका ती व्यवसायीबाट १० लाख अमेरिकी डलर जरिवाना लिइएको छ । ‘हामीले सार्वजनिक सुरक्षा र राष्ट्रिय सुरक्षा खतरामा पार्ने गतिविधि गरेकालाई समेत पक्राउ गरेका छौं, ती सबै गैरकानुनी आप्रवासी मात्र छैनन्,’ आइसको विज्ञप्तिमा उल्लेख छ ।

अमेरिकी राष्ट्रपति डोनाल्ड ट्रम्पले गैरकानुनी आप्रवासीलाई निष्कासन गर्ने नीतिलाई कडाइका साथ कार्यान्वयन गर्ने आदेश जारी गरेका थिए । त्यसअनुसार सीमामा सुरक्षाकर्मीको परिचालनसँगै प्रविधियुक्त कडाइका कारण गैरकानुनी आप्रवासी निष्कासनको संख्या बढाइएको छ भने सीमाबाट प्रवेश गर्ने संख्या न्यून छ ।

राष्ट्रिय सुरक्षा अभियानलाई कायम राख्दै गैरकानुनी आप्रवासी निष्कासनलाई अझै तीव्रता दिने र पक्राउ दरलाई बढाइने आइसका उपनिर्देशक म्याडिसन डी सियानले अमेरिकी सञ्चारमाध्यमलाई बताएका छन् । ‘हामीले मानव तस्करी गर्ने गिरोहलाई समेत अनुसन्धानमा ल्याएका छौं, तस्करले प्रत्येक वर्ष ५ देखि ७ सय अवैध आप्रवासीलाई अमेरिकामा ल्याउने गर्दै आएका छन्,’ उनले भनेका छन् । 

आइसको तथ्यांकअनुसार पहिलो चरणमा निष्कासन हुने सूचीमा रहेका १ हजार ३ सय ६५ नेपालीमध्ये ७९ जनालाई नेपाल पठाइसकिएको छ । काठमाडौंस्थित अध्यागमन विभागका निर्देशक तथा सूचना अधिकारी टीकाराम ढकालका अनुसार निष्कासित हुनेमा जनवरीमा ६, फेब्रुअरीमा २०, मार्चमा ३० र अप्रिलमा २६ जना छन् । जसमा ६६ पुरुष र १३ जना महिला छन् । 

अमेरिकाबाट निष्कासित नेपालीलाई चार्टर विमान, भारत हुँदै र नियमित उडानमार्फत नेपाल ल्याइएको सूचना अधिकारी ढकालले बताए । हालसम्म दुई पटक चार्टर विमानमार्फत निष्कासन गरिएकाहरूलाई काठमाडौंस्थित अध्यागमनमा बुझाइएको उनले जानकारी दिए । ‘डिपोर्ट भई अमेरिकाबाट नेपाल आएका ७९ जनालाई हामीले सामान्य सोधपुछ र उनीहरूको प्रोफाइल जाँच गरेर परिवारको जिम्मा लगाइसकेका छौं,’ ढकालले भने ।