थाइल्यान्डको बैंककमा पनि भूकम्पले निर्माणाधीन ३० तले भवन ढल्दा ८१ श्रमिक बेपत्ता
बैंकक — म्यानमारमा शुक्रबार गएको शक्तिशाली भूकम्पमा परी कम्तीमा एक सय ४४ जनाको मृत्यु भएको म्यानमारको सैन्य सरकारले जनाएको छ । भूकम्पमा परी सयौं व्यक्ति घाइते भएका छन् । भूकम्पले ठूलो मानवीय तथा भौतिक क्षति पुर्याएको उद्धार टोलीका सदस्यले बताएको बीबीसीले उल्लेख गरेको छ ।
शुक्रबार दिउँसो म्यानमारको सागिङ सहरको उत्तरपश्चिममा ७.७ म्याग्निच्युडको भूकम्प गएको अमेरिकी भूगर्भीय सर्वेक्षण (यूएसजीएस) ले जनाएको छ । केही मिनेटपछि सोही क्षेत्रमा ६.४ म्याग्निच्युडको भूकम्प गएको थियो । यूएसजीएसका अनुसार भूकम्पको गहिराइ जमिनको सतहबाट १० किलोमिटर तल थियो ।
भूकम्पको केन्द्रबिन्दु म्यानमारको मण्डले सहरबाट १७ किलोमिटर पर थियो । यो सहरमा करिब १५ लाखको बसोबास छ । प्रत्यक्षदर्शीका अनुसार ताउन्गु सहरमा मस्जिद भत्किँदा कम्तीमा ३ जना, औंगबानमा होटल भत्किँदा २ जनाको मृत्यु र २० जना घाइते भएको रोयटर्सले उल्लेख गरेको छ ।
म्यानमारमा सन् २०२१ मा सेनाले कु गरी सत्ता हत्याएको थियो । सैन्य सरकारले देशभित्रका सूचना सार्वजनिक गर्न कडाइ गर्दै आएको छ । सोही कारण भूकम्पको वास्तविक क्षति सार्वजनिक हुन सकेको छैन । यद्यपि, म्यानमारको सैन्य सरकारका प्रमुख मिन अङ हलइङले १ सय ४४ को मृत्यु र ७३२ जना घाइते भएको जानकारी दिएको बीबीसीले उल्लेख गरेको छ । न्याइपेईमा ९६ सागिङमा १८ र म्यान्डलीमा ३० जनाको मृत्यु भएको जनाइएको छ ।
भूकम्पले म्यानमारको छिमेकी थाइल्यान्डमा ३ जनाको मृत्यु भएको छ । बैंककमा निर्माणाधीन ३० तले सरकारी कार्यालय ढल्दा ८१ श्रमिक फसेका छन् । थाई राजधानीको उत्तरी भेगमा रहेको यो भवन केही सेकेन्डमा भग्नावशेष भएको थियो । यसबीच थाई प्रधानमन्त्री पेतोङतार्न सिनावात्राले आपत्कालीन अवस्था घोषणा गरिएको बताएकी छन् । थाई सेनाका अनुसार बैंककमा भत्किएका अन्य भवन पनि निर्माणाधीन थिए । यहाँ मेट्रो तथा रेल सेवा पनि रोकिएको छ ।
म्यानमारको ठूलो सहर यांगुनका एक स्थानीयले भूकम्पको झड्का करिब ४ मिनेटसम्म महसुस गरेको बीबीसीलाई बताएका छन् । ‘सबै कुरा हल्लिन थालेपछि हामी घरबाट निस्कियौं,’ म्यान्डलीका एक बासिन्दाले रोयटर्सलाई भने, ‘मेरै आँखाअघि एउटा पाँच तले भत्किएको देखें । सबै जना त्रासमा छन् । कोही पनि घरमा फर्किन सकेका छैनन् ।’
भूकम्पले म्यानमारको राजधानी न्यापिडोका सडकहरू ध्वस्त पारेको, भवनलाई क्षति पुर्याएको तस्बिर सार्वजनिक भएको छ । इरावजी नदीमा बनेको ठूलो पुल पनि ध्वस्त भएको छ । बेइजिङको भूकम्प एजेन्सीका अनुसार कम्पन चीनको दक्षिणपश्चिमी युनान प्रान्तमा पनि महसुस गरिएको छ । एजेन्सीले ७.९ म्याग्निच्युडको कम्पन मापन गरेको छ ।
यसबीच म्यानमारको सैन्य सरकारले अन्तर्राष्ट्रिय सहयोगका लागि अपिल गरेको छ । सरकारले देशका ६ स्थानमा आपत्कालीन अवस्था घोषणा गरेको पनि जानकारी दिएको छ । सैन्य सरकार प्रमुख हलइङले घाइते राखिएका अस्पतालहरूको भ्रमण गर्दै अन्य देशबाट सक्दो सहयोगको आशा राखेको बताएका हुन् ।
म्यानमारमा यसअघि सन् १९३० देखि १९५६ सम्म सागिङ फल्टको वरपर ६ वटा ठूला भूकम्प आएका थिए । मध्य म्यानमारको प्राचीन राजधानी बगानमा ६.८ म्याग्निच्युडको शक्तिशाली भूकम्पले सन् २०१६ मा तीन जनाको ज्यान लिएको थियो भने पर्यटन स्थलका मन्दिर र स्तम्भहरू भत्किएका थिए ।
विशेषज्ञका अनुसार म्यानमारका सहरहरूमा तीव्र विकास, पुरानो पूर्वाधार र कमजोर सहरी योजनाले लोकप्रिय क्षेत्रलाई भूकम्प र अन्य विपत्तिबाट असुरक्षित छन् । थाइल्यान्ड पनि ‘भूकम्प जोन’ मा पर्दैन । यहाँ महसुस गरिएका सबै भूकम्प छिमेकी देश म्यानमारमा केन्द्रबिन्दु भएका छन् ।
