काठमाडौँ — अमेरिकी राष्ट्रपति डोनाल्ड ट्रम्पले हमासको कब्जामा रहेका इजरायली बन्धकको रिहाइलाई लिएर हमासलाई अन्तिम चेतावनी दिएका छन् ।
सामाजिक सञ्जाल ट्रुथमा एक पोस्ट लेख्दै ट्रम्पले भनेका छन्, ‘इजरायलका लागि म ती सबै कुरा पठाउँदैछु, जो उसलाई काम पूरा गर्नका लागि आवश्यक छन् । यदि मेरो कुरा मानेनन् भने हमासका एक जना सदस्य पनि सुरक्षित हुने छैनन् ।’
यस्तै उनले सबै बन्धकलाई एकैसाथ रिहा गर्न पनि भनेका छन् । ट्रम्पले अघि लेखेका छन्, ‘यदि बन्धकलाई रिहा गरिएन भने हमासले यसको भारी मूल्य चुकाउनुपर्नेछ।’ यद्दपि उनले इजरायललाई कस्तो प्रकारको सहयोग पठाउँदैछन् भन्ने स्पष्ट छैन ।
उनले बन्धकलाई एकैसाथ रिहा मात्र नभइ मृतकहरुको शव पनि तुरुन्त फर्काउन चेतावनी दिएका छन् । ‘सबै बन्धकलाई तत्काल रिहा गर । पछि हुँदैन र जसलाई मार्नुभएको छ उनीहरुको शव पनि तत्कालै फर्काउनुहोस् । नत्र सबै नष्ट हुनेछ,’ चेतावनी दिँदै ट्रम्पले लेखेका छन् ।
उनले यो अन्तिम चेतावनीसमेत रहेको र हमास नेतृत्वले अब गाजा छोड्ने समय आइसकेको बताएको बीबीसीले उल्लेख गरेको छ ।
उनले भनेका छन्, ‘गाजाका नागरिककका लागि एक सुन्दर भविष्य कुरिरहेको छ । तर अब तपाईंहरु बन्धकलाई राख्न सक्नुहुन्न । यदि मान्नुभएन भने तपाईंहरुको अन्त्य हुनेछ ।’
ट्रम्पको यो धम्की ह्वाइट हाउसमा इजरायली बन्धकको एक समूहसँगको भेटपछि आएको हो । उनीहरुलाई हालै युद्धविरामका बेला रिहा गरिएको थियो ।
