अमेरिकासँग जुनसुकै युद्धका लागि तयार रहेको चीनको घोषणा
काठमाडौँ — अमेरिकी राष्ट्रपति डोनाल्ड ट्रम्पले चिनियाँ सामानहरुमा थप कर लगाएपछि चीनले त्यसको प्रतिक्रिया दिएको छ । अमेरिकी करको बदलमा चीनले पनि अमेरिकी कृषि उत्पादनहरुमा १० देखि १५ प्रतिशतसम्म कर लगाएर प्रतिकार गरेको छ ।
साथै चीनले अमेरिकासँग कुनै पनि प्रकारको युद्ध लड्न तयार रहेको घोषणा गरेको छ । यदि अमेरिकाले युद्ध चाहेको हो भने कर युद्ध, व्यापार युद्ध वा अन्य जुनसुकै प्रकारको युद्ध लड्न आफू तयार रहेको चीनले चेतावनी दिएको छ ।
अमेरिकास्थित चिनियाँ दूतावासले बुधबार सामाजिक सञ्जालमा सरकारी विज्ञप्तिको एक लाइन पुनः पोस्ट गर्दै यस्तो चेतावनी दिएको हो । ट्रम्प दोस्रो पटक राष्ट्रपति बनेयता चीनबाट यो अहिलेसम्मकै सबैभन्दा बलियो उद्घोष हो ।
बेइजिङमा चिनियाँ कम्युनिष्ट पार्टीका शीर्ष नेताहरू वार्षिक राष्ट्रिय जन कंग्रेसको लागि भेला हुँदा यो प्रतिक्रिया आएको हो । बुधबार मात्रै चीनका प्रधानमन्त्री ली छियाङले आफ्नो देशको रक्षा खर्च ७ दशमलव २ प्रतिशतले बढाउने घोषणा गरेका थिए ।
