लन्डन — बेलायत र फ्रान्सले युद्धग्रस्त युक्रेनमा शान्ति स्थापनाका लागि अमेरिकी राष्ट्रपति डोनाल्ड ट्रम्पसँग छलफल गर्ने भएका छन् । युक्रन युद्ध रोक्ने विषयमा बेलायत र फ्रान्सले शान्ति योजना तयार गर्ने र त्यसबारे ट्रम्पसँग छलफल गर्ने बेलायती प्रधानमन्त्री केयर स्टार्मरको भनाइ छ । 

स्टार्मरका अनुसार युक्रेनी राष्ट्रपति जेलेन्स्की र फ्रान्सका राष्ट्रपति इमानुएल म्याक्रोंसँगको छलफलपछि युद्ध रोक्नका लागि काम गर्ने सहमति भएको हो । यसमा अन्य एक-दुई देश थपिन सक्ने स्टार्मरको भनाइ छ । ‘बेलायत, फ्रान्स र सम्भवतः एक वा दुई अन्य देश युक्रेनसँग लडाइँ रोक्ने योजनामा काम गर्नेछन् । र, त्यसपछि हामीले त्यो योजनाबारे अमेरिकासँग छलफल गर्नेछौं ।’

युक्रेनले तीन वर्ष लामो रक्तपातपूर्ण द्वन्द्व भोगेको र सबै मिलेर काम गर्न सक्ने बाटो खोज्नुपर्ने स्टार्मरको भनाइ छ । ‘अब हामी दिगो शान्तिमा पुग्नुपर्छ । मलाई लाग्छ हामीले सही दिशामा एक कदम चालेका छौं,’ स्टारमरले बीबीसीमा भनेका छन् । 

यसअघि बेलायतले युक्रेनलाई २ अर्ब २६ करोड पाउन्ड सहयोग गर्ने विषयमा सम्झौता भइसकेको छ । खनिज सम्झौताका विषयमा अमेरिकी राष्ट्रपति डोनाल्ड ट्रम्प र उपराष्ट्रपति जेडी भान्ससँग चर्काचर्की भएपछि बेलायत पुगेका युक्रेनी राष्ट्रपति भ्लोदिमिर जेलेन्स्की र बेलायती प्रधानमन्त्री स्टार्मरबीच सहायता सम्झौता भएको हो । सम्झौताका क्रममा स्टार्मरले बेलायत सधैं युक्रेनको साथमा रहेको बताएका थिए ।