काठमाडौँ — प्यालेस्टिनी भूभागमाथिको अवैधानिक कब्जाबाट १ वर्षभित्र इजरायल फिर्ता हुनुपर्ने प्रस्ताव संयुक्त राष्ट्रसंघको महासभाबाट पारित भएको छ ।  पूर्वी जेरुसलेमसहितका प्यालेस्टिनी भूभागमा इजरायलको 'अवैधानिक उपस्थिति' अन्त्य हुनुपर्ने मागसहित प्यालेस्टाइनको प्रस्ताव राष्ट्रसंघको महासभाबाट पारित भएको हो ।

 प्यालेस्टाइनद्वारा मस्यौदा गरिएको उक्त प्रस्तावका पक्षमा १२४ मुलुकले मत दिएका थिए । त्यस्तै १४ मुलुक भने उक्त प्रस्तावको विपक्षमा थिए । नेपालसहित ४३ मुलुक भने मतदानमा तटस्थ रहे । प्यालेस्टाइन भने संयुक्त राष्ट्रसंघ पर्यवेक्षक मात्र भएकाले मत हाल्न पाउँदैन । प्रस्तावको विपक्षमा मत दिने मुलुकहरूमा अमेरिका, अर्जेन्टिना, चेक, फिजी, हंगेरी, इजरायल, मालावी, माइक्रोनेसिया, नाउरू, पालाउ, पपुवा न्यु गिनी, पाराग्वे, टोंगा र टुभालु रहेका छन् ।