काठमाडौँ — विकिलिक्सका संस्थापक जुलियन असान्ज ५ वर्षपछि बेलायतको जेलबाट रिहा भएका छन् । अमेरिकी अधिकारीहरूसँग एउटा सम्झौता गरेपछि असान्ज बेलायती जेलबाट रिहा भएको अन्तर्राष्ट्रिय सञ्चारमाध्यमहरूले बताएका छन् । जेलबाट रिहा भएलगत्तै असान्ज बेलायतबाट अस्ट्रेलियातर्फ हिँडिसकेको बीबीसीले जनाएको छ ।

अमेरिकासँग भएको सम्झौताअनुरूप अस्ट्रेलियाली नागरिक असान्जले अमेरिकी अदालतमा उपस्थित भएर आफूमाथि लागेको अपराध स्वीकार्नुपर्ने छ । यही बुधबार प्रशान्त महासागरमा अवस्थित नर्दन मारियाना आइल्यान्ड्सको एक अदालतमा उपस्थित भएर असान्जले अपराध स्वीकार्ने सहमति भएको बीबीसीको समाचारमा उल्लेख छ । असान्जलाई अमेरिकी राष्ट्रिय सुरक्षासम्बन्धी अति गोप्य सूचना अनधिकृत रूपमा प्राप्त गरेको र ती सूचनाहरू चुहाएको अभियोग लगाइएको छ । 

Julian Assange boards flight at London Stansted Airport at 5PM (BST) Monday June 24th. This is for everyone who worked for his freedom: thank you.#FreedJulianAssange pic.twitter.com/Pqp5pBAhSQ

सन् २०१९ मा अमेरिकी सरकारले विकिलिक्सका संस्थापक असान्जमाथि विभिन्न १८ वटा आरोप लगाएको थियो । इराक र अफगानिस्तान युद्धसम्बन्धी अति गोपनीय सूचनाहरू सार्वजनिक गर्दा कैयौँ मानिसको जीवन नै खतरामा समेत परेको अमेरिकी सरकारको दाबी थियो । असान्जले भने आफूमाथि लगाइएका आरोपहरू निराधार रहेको बताउँदै आएका थिए । आफूले गरेका काम पत्रकारिता नै रहेको उनको दाबी छ । विकिलिक्सले समेत सामाजिक सञ्जाल एक्समा असान्ज रिहा भएको जानकारी पोस्ट गरेको छ । लन्डनस्थित उच्च अदालतले असान्जलाई रिहा गरेको विकिलिक्सले जनाएको छ । असान्ज करिब ५ वर्ष बेलायती जेलमा रहे । विश्वव्यापी दबाबका कारण असान्ज रिहा भएको समेत विकिलिक्सको दाबी छ ।