भारतमा कोरोना खोप प्रयोगका लागि सिरम इन्स्टिच्युटले सरकारसँग माग्यो अनुमति
काठमाडौँ — भारतीय खोप सिरम इन्स्टिच्युट अफ् इन्डिया(एसआईआई)ले सरकारसँगको कोरोना भाइरसविरुद्धको खोप प्रयोगका लागि सरकारसँग अनुमति मागेको छ । डोजको संख्याका हिसाबले विश्वकै ठूलो खोप निर्माता कम्पनी मानिएको एसआईआईले कोरोना खोपको आपत्कालीन प्रयोगको अनुमति मागेको हो ।
एसआईआईले भारतमा अक्सफोर्ड विश्वविद्यालय र ब्रिटिस औषधि निर्माता कम्पनी एस्ट्राजेनेकासँगको सहकार्यमा कोरोना खोप विकास गरिरहेको छ । भारतीय औषधि महानियन्त्रक(डीसीजीआई) सँग यसअघि अमेरिकी कम्पनी फाइजरले जर्मन कम्पनी बायोएनटेकसँग संयुक्त रुपमा विकास गरेको कोरोना खोपको आपत्कालीन प्रयोगका लागि अनुमति मागिसकेको छ । फाइजरको कोरोना खोपको प्रयोगका लागि बेलायत र बहराइनले अनुमति दिइसकेका छन् ।
बेलायतमा फाइजरको कोरोना खोप प्रयोग गर्न अनुमति
एसआईआईले अक्सफोर्ड विश्वविद्यालय र एस्ट्राजेनेकासँगको सहकार्यमा भारतमा कोभिसिल्ड नामक कोरोना खोप उत्पादन गरिरहेको छ । यसअघि कम्पनीले सन् २०२० अन्त्यसम्ममा कोरोना खोप उत्पादन हुने बताएको थियो । शुक्रबार मात्रै भारतीय प्रधानमन्त्री नरेन्द्र मोदीले केही हप्तामै भारतका कोरोना खोप उपलब्ध हुने बताएका थिए । मोदीले एसआईआईलगायत विभिन्न औषधि र खोप निर्माण गर्ने कम्पनीको भ्रमणपछि केही हप्तामै कोरोना खोप उपलब्ध हुने बताएका थिए ।
एसआईआईका प्रमुख कार्यकारी अधिकृत(सीईओ) अदार पुनावालाले वाचागरेअनुरुप नै कम्पनीले सरकारसँग कोभिसिल्डको आपत्कालीन प्रयोग अनुमति माग गरेको बताएका छन् । साथै उनले भारत सरकार र प्रधानमन्त्री नरेन्द्र मोदीलाई कोरोना खोपको विकासमा महत्वपूर्ण साथ दिएको उल्लेख गर्दै यसले लाखौंलाई बचाउन सकिने बताएका छन् । सीईओ पुनावालाका अनुसार एसआईआईले पहिलो ब्याचअन्तर्गत एक सय करोड डोज उत्पादन गर्नेछ । उक्त परिमाणको खोप सन् २०२१ पहिलो र दोस्रो त्रैमासिकसम्म उत्पादन भइसक्ने उनले बताएका छन् ।
As promised, before the end of 2020, @SerumInstIndia has applied for emergency use authorisation for the first made-in-India vaccine, COVISHIELD. This will save countless lives, and I thank the Government of India and Sri @narendramodi ji for their invaluable support.
— Adar Poonawalla (@adarpoonawalla) December 7, 2020
एसआईआईले भारतीय आयुर्विज्ञान अनुसन्धान परिषद् (आईसीएमआर) को निगरानीमा भारतका विभिन्न ठाउँमा कोरोना खोपको तेस्रो चरणको चिकित्सकीय परीक्षण गरेको थियो । एसआईआइले परीक्षणको रिपोर्ट सार्वजनिक गर्दै कोभिसिल्ड सुरक्षित रहेको र लक्षित व्यक्तिमा प्रभावकारी देखिएको दाबी गरेको थियो ।
केही हप्ताअघि अक्सफोर्ड र एस्ट्राजेनेकाले आफूले विकास गरेको कोरोना खोप औसतमा ७० प्रतिशत प्रभावकारी भएको बताएको थियो । कोरोना खोपको मात्रा र संक्रमितको अवस्थाअनुसार ९० प्रतिशतसम्म प्रभावकारी देखिएको एस्ट्राजेनेकाले दाबी गरेको थियो । कोभिसिल्ड पाका उमेरका व्यक्तिमा पनि प्रभावकारी देखिएको एसआईआईको दाबी छ ।
कोभिसिल्ड २ देखि ८ डिग्री सेल्सियससम्मको तापक्रममा भण्डारण र ओसारपसार गर्न सकिने दाबी गरिएको छ । फाइजरको कोरोना खोपको भण्डारणका लागि माइनस ७० डिग्री सेल्सियससम्मको तापक्रम चाहिने बताइएको छ ।
नेपालले पनि कोरोनाविरुद्धको खोप ल्याउन एसआईआईसँग छलफल गरिरहेको छ । पुनावालाले केही दिनअघि एउटा टेलिभिजन अन्तर्वार्तामा कोभिड खोपका लागि नेपाल र बंगलादेशलाई समेत उच्च प्राथमिकतामा राखेको बताएपछि यताबाट सम्पर्क सुरु गरिएको थियो ।
सम्बन्धित समाचार
प्रकाशित : मंसिर २२, २०७७ १४:२९