बेलायतमा फाइजरको कोरोना खोप प्रयोग गर्न अनुमति- विश्व - कान्तिपुर समाचार

बेलायतमा फाइजरको कोरोना खोप प्रयोग गर्न अनुमति

कोरोना खोप प्रयोगको अनुमति दिने बेलायत पहिलो मुलुक
एजेन्सी

लन्डन — बेलायतले फाइजर र बायोएनटेकले बनाएको कोरोनाविरुद्धको खोपको आपत्कालीन प्रयोग अनुमति दिएको छ ।

बेलायती नियमनकारी निकाय मेडिसिन एन्ड हेल्थकेयर प्रोडक्ट्स रेगुलेटरी एजेन्सी(एमएचआरए) ले फाइजरको खोप सुरक्षित रहेको भन्दै प्रयोगको अनुमति दिएको हो । कोरोनाविरुद्धको खोपको प्रयोग अनुमति प्रदान गर्ने बेलायत विश्वकै पहिलो देश भएको छ ।

फाइजर र बायोएनटेकले विकास गरेका खोप मानिसलाई कोरोना भाइरसबाट बचाउन ९५ प्रतिशत प्रभावकारी भएको समाचार हालै मात्र प्रकाशित भएको थियो । तर, यसलाई भण्डारण गर्न एकदम न्यून तापक्रम (–७० डिग्री सेन्टिग्रेड) आवश्यक पर्ने बताइएकाले भण्डारण र ओसारपसारमा चुनौती रहेको स्वास्थ्यविद्हरूको धारणा छ ।

बीबीसीका अनुसार केही दिनमै कोरोनाको उच्च जोखिममा रहेका व्यक्तिलाई खोप दिन सु्रु गरिनेछ ।

बेलायतले करिब फाइजरसँग ४ करोड डोज कोरोना खोप अर्डर गरिसकेको छ । पहिलो लटमा बेलायतलाई एक करोड डोज छिट्टै उपलब्ध गराइने फाइजरले जनाएको छ । यो खोपको विकास १० महिनाको अन्तरालमा भएको हो ।

बेलायत सरकारले अक्सफोर्ड र एस्ट्राजेनेकाको १० करोड र मोडेर्नाको ५० लाख डोज यसअघि नै ‘अर्डर’ गरिसकेको छ ।

कोरोना खोप सुरुमा राष्ट्रिय स्वास्थ्य सेवा (एनएचएस) का कर्मचारीलाई र त्यसपछि केयर होममा रहेका र ८० वर्षभन्दा माथिका वृद्धवृद्धालाई दिइनेछ । सरकारले यसअघि कोभिड संक्रमणको उच्च जोखिममा पर्ने ‘केयर होम’ मा रहेकाहरू र ८० वर्षभन्दा माथिकालाई खोपमा पहिलो प्राथमिकता दिने बताएको थियो ।

दी जोइन्ट कमिटी अन भ्याक्सिनेसन एन्ड इमुनाइजेसनले सुरुमा ‘केयर होम’ बसेकाहरू र त्यहाँका कर्मचारी अनि त्यसपछि ८० वर्ष उमेर कटेका र सामान्य स्वास्थ्य कर्मचारीहरूलाई खोप लगाउन सुझाएको छ ।

बेलायतमा कोभिड प्रतिरोधी खोप वितरणको जिम्मा व्यापार मन्त्री नाधिम जहावीलाई दिइएको प्रधानमन्त्री कार्यालयले जनाएको छ । प्रधानमन्त्री बोरिस जोन्सनले जहावीलाई कम्तीमा आउँदो ग्रीष्मयामसम्म खोप वितरणको रेखदेख गर्न नियुक्त गरेको जनाइएको छ ।

प्रकाशित : मंसिर १७, २०७७ १३:२०
प्रतिक्रिया
पठाउनुहोस्

प्रहरी हत्याका अभियुक्त कारागार चलान

अर्जुन शाह

धनगढी — धनगढीको जुगेडास्थित अस्थायी प्रहरी पोस्टका इन्चार्ज असई गोविन्द विक र जवान रामबहादुर साउदको हत्यामा संलग्न रहेको अभियोग लागेका ९ मध्ये ८ जना कारागार चलान भएका छन् । एक व्यापारी भने धरौटीमा छुटेका छन् ।

जिल्ला प्रहरी कार्यालयका डीएसपी प्रतीक विष्टका अनुसार पक्राउ गरी मुद्दा चलाइएका धनगढी–१० का ३१ वर्षीय रोहित राना, सोही नामका अर्का व्यक्ति, २० वर्षीय राजेन्द्र राना, ३० वर्षीय सुरेश राना, २५ वर्षीय राजकुमार राना, २२ वर्षीय रामनिवास राना, २९ वर्षीय दलराम राना र २५ वर्षीय रामगोपाल राना कारागार चलान भएका हुन् ।

सरकारी वकिल कार्यालयका अनुसार जिल्ला अदालत कैलालीका न्यायाधीश दयानन्द पनेरूको इजलासले मंगलबार गरेको थुनछेक आदेशअनुसार आठ जनालाई पुर्पक्षका लागि कारागार चलान गर्ने आदेश भएको हो । अर्का अभियुक्त धनगढीका राजीव गुप्ता भने डेढ लाख धरौटीमा रिहा भएका छन् । गुप्ता धनगढीका मटर (केराउ) कारोबारी हुन् । उनको पनि हत्यामा संलग्नता रहेको प्रहरीको दाबी छ ।

गत असोज मसान्त राति नेपाल–भारत सीमाक्षेत्रको मोहना किनारमा रहेको उक्त चौकीबाट गस्तीमा खटिएका प्रहरीलाई तस्करहरूको समूहले आक्रमण गरी हत्या गरेको थियो । केराउ तस्करी गरी भारततर्फ निकासी गर्दै गरेको समूहलाई गस्तीमा रहेका असई विक र जवान साउदले रोक्न खोज्दा धारिलो हतियार प्रहार गरी हत्या गरेको थियो । उनीहरूको शव मोहना नदीमा गाडेको अवस्थामा फेला परेको थियो ।

सरकारी वकिल कार्यालय, कैलालीले अभियुक्तमाथि कात्तिक २८ मै अभियोग दायर गरेको भए पनि अभियुक्तहरूलाई कोरोना देखिएको र नेगेटिभ रिपोर्टआएपछि मात्रै थुनछेक बहस भएकाले ढिलाइ भएको जिल्ला प्रहरी कार्यालयले जनाएको छ ।

प्रकाशित : मंसिर १७, २०७७ १३:०४
पूरा पढ्नुहोस्
प्रतिक्रिया
पठाउनुहोस्
×