काठमाडौँ — काठमाडौं महानगरपालिकाले जेठ ७ देखि टुँडिखेलमा सीप मेला संचालन गरिरहेको छ । विभिन्न १० क्षेत्रका ३७ वटा पेसासँग सम्बन्धित तालिममा सहभागीहरुको भीडले टुँडिखेल गुल्जार देखिन्छ ।

रोजगारी र आय वृद्धि गर्न महानगरले सुरु गरेको यो निःशुल्क तालिममा सबैभन्दा धेरै सहभागी भने भर्खरै कक्षा १२ को परिक्षा सकेका विद्यार्थीहरु छन् । 

सीप मेला कार्यान्वयन समितिका संयोजक शैलेन्द्र झाले स्वरोजगार र रोजगारी वृद्धि गर्ने लक्ष्य राखेर मेला आयोजना गरिएको बताए । महानगरले यस्तै मेलाको पहिलो संस्करण अघिल्लो वर्ष सम्पन्न गरेको थियो । उनले यो वर्ष २०८२ जनालाई तालिम दिने लक्ष्य भएको तर आवेदन भने ३५ सयभन्दा बढीको परेकाे बताए । यसपालाको सीप मेलामा २ हजार ५ सय ४७ जनाले तालिम लिन छनौट भएका थिए ।