काठमाडौँ — भिडियो सेयरिङ प्लाटफर्म, टिकटकले सन् २०२६ को पहिलो तीन महिनामा नेपालबाट करिब २० लाखवटा भिडियो हटाएको छ । कम्पनीले ‘टिकटक लाइभ’ मा हुने गतिविधिमाथि पनि निगरानी बढाएर सस्पेन्सन दर २.७ प्रतिशत पुऱ्याएको जनाएको छ । नेपालमा हटाइएका सामग्रीहरू यस अवधिमा पोस्ट भएका कुल भिडियोको ०.४ प्रतिशत हुन् ।

टिकटकले जनवरीदेखि मार्चभित्र नेपालबाट १९ लाख ६१ हजार ६ सय ९८ वटा भिडियो हटाएको छ । कम्युनिटी गाइडलाइन उल्लंघन गरेको भन्दै ती भिडियो प्लाटफर्मबाट हटाइएका हुन् । कुल हटाइएका भिडियोमध्ये ९९.२ प्रतिशत भिडियो कम्पनीले सक्रिय रूपमा आफैँ पत्ता लगाएर हटाएको जनाएको छ । 

त्यस्तै, ८६.५ प्रतिशत भिडियो पोस्ट भएको २४ घण्टाभित्रै हटाइएका थिए । केही भिडियोहरू भने थप समीक्षापछि रिस्टोर गरिएका छन् । नेपालमा यस अवधिमा ६१ हजार ९ सय ९२ वटा भिडियो रिस्टोर भएका हुन् ।

यो अवधिमा टिकटकले विश्वभरबाट १८ करोड ४० लाखभन्दा बढी भिडियो हटाएको छ । यो संख्या प्लाटफर्ममा अपलोड गरिएका कुल सामग्रीको करिब ०.५ प्रतिशत हो । कम्युनिटी गाइडलाइन्स उल्लङ्घन गर्ने अधिकांश कन्टेन्ट अटोमेसन प्रविधिमार्फत पहिचान गरी हटाइँदै आएको कम्पनीले जनाएको छ ।

टिकटकले विश्वभर ८ करोड ६२ लाखभन्दा बढी फेक एकाउन्ट पनि बन्द गरेको कम्पनीको वेबसाइनमा रहेको कम्युनिटी गाइडलाइन्स इनफोर्समेन्ट रिपोर्टमा देखिन्छ । यसैगरी १३ वर्षभन्दा कम उमेरका हुन सक्ने आशंकामा २ करोड ५७ लाखभन्दा बढी खाताहरू हटाइएको कम्पनीले जनाएको छ । 

टिकटकले पछिल्लो समय लाइभ प्रसारणमा पनि निगरानी थप कडा बनाएको छ । लाइभ सस्पेन्सन दर बढेर २.७ प्रतिशत पुगेको र यो अहिलेसम्मकै उच्च रहेको विज्ञप्तीमा उल्लेख छ । यस अवधिमा ५ करोड ८२ लाखभन्दा बढी लाइभ सेसनमा चेतावनी दिने वा मनिटाइजेसन बन्द गर्ने जस्ता कारबाही गरिएको भनिएको छ ।