काठमाडौँ — सरकारले अवैध सट्टेबाजी (बेटिङ) एप र वेबसाइटहरू धमाधम बन्द गर्न थालेको छ । हालसम्म करिब २६१ वटा बेटिङ एपहरू बन्द भइसकेको सञ्चार तथा सूचना प्रविधि मन्त्रालयले जनाएको छ । 

शनिबार मन्त्रिपरिषद्को बैठकले स्वीकृत गरेको शासकीय सुधारसम्बन्धी एक सयवटा कार्यसूचीअन्तर्गत सञ्चार मन्त्रालयलाई सट्टेबाजी एप र त्यससँग सम्बन्धित वेबसाइटहरू २४ घण्टाभित्र बन्द गर्न निर्देशन दिइएको थियो । मन्त्रालयका प्रवक्ता उदयबहादुर रानाले हालसम्म करिब २६१ वटा बेटिङ एपहरू बन्द भइसकेको र अन्य यस्ता एपहरूको खोजी गर्ने कार्य जारी रहेको जानकारी दिए । 

प्रवक्ता रानाका अनुसार सरकारले त्यस्ता एप र वेबसाइटहरूको खोजी गर्दै बन्द गराउने क्रम जारी राखेको छ । मन्त्रालयले आइतबार नै दूरसञ्चार प्राधिकरणलाई पत्र लेखेर यस्ता अवैध एप बन्द गराउन निर्देशन दिएको थियो ।