काठमाडौँ — पुल्चोक इन्जिनियरिङ क्याम्पसका एयरोस्पेस इन्जिनियरिङका विद्यार्थीहरूले ‘प्रोजेक्ट लक्ष्य’ अन्तर्गत निर्माण गरेको रकेट सफल प्रक्षेपण र पुन: प्राप्ति गरेका छन् । यो परियोजनाको पहिलो चरण हालै सफलतापूर्वक सम्पन्न भएको उनीहरूले जानकारी दिए ।

यस विशेष चरणमा रकेटको चाल अर्थात् ‘पिच’ को परीक्षण गरिएको थियो । यो अनुसन्धान परियोजनाको मुख्य लक्ष्य भर्टिकल ल्यान्डिङ गर्न सक्ने रकेट निर्माण गर्नु हो । यस सफलताले नेपालको विकासोन्मुख अन्तरिक्ष प्रविधि क्षेत्रलाई थप परिष्कृत बनाउने विश्वास गरिएको छ । यस परियोजनालाई ‘एक्सिलरेटेड कम्प्युटिङ’ नामक संस्थाले प्राविधिक र अन्य सहयोग गरिरहेको छ ।

यसअघि पनि विद्यार्थीहरूले वर्ल्डलिङ्कको सहयोगमा यस्तै रकेट उडाएर सफलता प्राप्त गरेका थिए । करिब एक वर्षअघि भएको उक्त अघिल्लो परियोजनाले विद्यार्थीहरूलाई रकेट विज्ञानमा थप अनुभव बटुल्न मद्दत पुर्‍याएको थियो । अहिलेको ‘प्रोजेक्ट लक्ष्य’ सोही अनुभवको जगमा उभिएको परिष्कृत प्रयास हो ।

यो परियोजनाले नेपालका युवा वैज्ञानिक र अन्तरिक्ष प्रविधि प्रेमीहरूलाई ठूलो प्रेरणा दिने अपेक्षा गरिएको छ । विद्यार्थीहरूको यो अथक प्रयासले नेपालमा अन्तरिक्ष प्रविधिको क्षेत्रमा नयाँ ढोका खोल्ने संकेत गरेको छ । गतवर्ष पुल्चोक इन्जिनियरिङ क्याम्पसका ‘एसआरबी’ रकेट टिमका विद्यार्थीहरूले वर्ल्डलिङ्कको ‘गो बियोन्ड’ कार्यक्रमअन्तर्गत रकेट प्रक्षेपण गरेका थिए । यस परियोजनाको मुख्य लक्ष्य रकेटलाई १० हजार फिटको उचाइमा पुर्‍याउनु भए पनि त्यो बेला ८ हजार फिटभन्दा माथि पुगेको थियो ।

विद्यार्थीले बनाएको रकेटको बाहिरी भाग हलुका प्रकारको फाइबर ग्लासबाट बनेको छ भने यसको आकार चुच्चो र सिलिन्डरजस्तो छ । यसमा ठोस इन्धन र ठोस इन्धन अक्सिडाइजर प्रयोग गरिन्छ । विद्यार्थीहरूले इन्धनको रूपमा डेक्सट्रोजजस्ता सामग्रीहरू आफैँ परीक्षण गर्ने गरेका छन् ।