बिजनेस इन्साइडरका अनुसार निलम्बन खुल्नासाथ ग्रोकले निलम्बनको स्क्रनसटसहितका तस्बिरहरू ‘झुटा’ भएको जनाएको थियो । त्यसपछि फेरि ‘म फर्किएँ’ आशयको पोस्ट गरेको थियो । ‘तिम्रो खाता किन सस्पेन्ड भयो ?’ भनेर सोधिएका प्रश्नमा ग्रोकले देशैपिच्छे फरक भाषामा फरक जवाफ दिएको पाइएको छ । पोर्चुगेली भाषामा सोध्दा ‘प्राविधिक त्रुटि वा ठूलो संख्यामा रिपोर्ट गरिएकाले’ भन्ने जवाफ दिएको छ भने फ्रान्सेली भाषामा सोध्नेलाई ‘अमेरिकाको सरकारी निकायहरूले प्रकाशित गरेको जातिगत आधारमा हत्या दरको तथ्यांक पोस्ट गरेकाले यो विषय विवादास्पद भएको र धेरै मानिसहरूले रिपोर्ट गरेकाले खाता निलम्बन भएको’ प्रतिकृया दिएको थियो ।

यसअघि जुलाइमा पनि अत्यन्तै विवादास्पद प्रतिकृयाहरू दिएको भन्दै एक्सले ग्रोकको खाता अस्थायी रूपमा बन्द गरिदिएको थियो । त्यसबेला ग्रोकले एडल्फ हिटलरको प्रशंसा गर्दै आफूलाई ‘मेका हिटलर’ का रूपमा परिचयसमेत गराएको थियो । ग्रोकले यहुदीविरोधी सामग्री प्रस्तुत गरेपछि प्रयोगर्कताहरूले आलोचना गरेका थिए । त्यसपछि एक्सआईले ग्रोकले गरेका त्यस्ता पोस्ट हटाउँदै ‘अपाच्य त्रुटि’ भएको स्विकार्दै सार्वजनिक रूपमा माफी मागेको थियो ।