काठमाडौँ — अघिल्लो महिना मानव-आकृति (ह्युमनोडइ) रोबटबीच किकबक्सिङ प्रतियोगिता आयोजना गरेको चीनले हालै मात्र रोबटलाई फुटबल मैदानमा उतारेको छ ।

सो फुटबल प्रतियोगिताका भिडियो अहिले सामाजिक सञ्जालमा भाइरल छन् । बेइजिङमा आयोजित एआई रोबोट फुटबल प्रतियोगितामा रोबोटलाई सिधा उभिन र बललाई लात्ताले हान्न निकै कसरत गर्नुपरेको भिडियोमा देखिन्छ । 

सो प्रतियोगितामा कतिपय रोबोट कुद्दा-कुद्दै आफैँ लडेर घाइते भएपछि मैदानबाट बाहिरिनु परेको थियो । कतिपयले त यसलाई ‘नेमार-शैली’ को सम्झना दिलाएको भनेर सामाजिक सञ्जालमा हाँसी-मजाक गरिरहेका छन् । दुईटा रोबोटचाहिँ भुइँमा लडेर उठ्न नसकेपछि स्ट्रेचरमा हालेर बाहिर निकालिएको थियो । आधुनिक खेलकुद प्रतियोगिता अधिक रणनीतिकेन्द्रित हुँदा, ती रोबोटिकजस्तो लाग्ने गुनासो आइरहेका बेला रोबोटको खेल प्रदर्शनले भने कि लियन एमबाप्पेको जागिर सुरक्षित नै रहेको देखाउने द गार्जियनमा पत्रकार दान मिल्मोको ठट्यौलो टिप्पणी छ ।

आर्टिफिसियल इन्टेलिजेन्स (एआई)को सहयोगमा स्वाचालित रूपमा सञ्चालित रोबोटलाई तीन-तीन जनाको टोली बनाएर फुटबल खेलाइएको थियो । खेल्ने क्रममा उनीहरू धेरैपटक पुक्लुक्कै लड्ने र धरमराएको देखिएपछि अझै धेरै अभ्यासको खाँचो रहेको प्रतिक्रिया आइरहेका छन् ।

प्रतियोगिताको फाइनलमा सिङ्गुआ विश्वविद्यालयको टीएचयू रोबोटिक्सले चाइना एग्रिकल्चरल युनिभर्सिटीको माउन्टेन सी टोलीलाई ५-३ गोलले हराएर च्याम्पियनसिप जितेको थियो ।