सान इसिद्रो — दिवंगत फुटबलका दिग्गज डिएगो म्याराडोनाको उपचारमा संगल्न चिकित्सकीय टोलीको कानुनी सुनुवाइ अझै चलिरहेको छ । यो उत्तिकै तनाव र आक्रोशपूर्ण रहेको छ, जति म्याराडोनाको खेलजीवन आफैंमा अशान्त र उतारचढावपूर्ण थियो ।

सन् २०२० मा म्याराडोनाको निधन भएको थियो । यसपछि सात स्वास्थ्यकर्मीमाथि लापरबाहीको आरोप लागेको थियो । अप्रिलबाट कानुनी प्रक्रिया सुरु भएको हो । शल्यक्रिया भएको दुई सातापछि नै ‘हार्ट फेलियर’ र ‘एक्युट पाल्मोनरी एडिमा’ का कारण उनको मृत्यु भएको थियो ।

यस मुद्दाको सुनुवाई अगस्टमै सकिनुपर्ने थियो । तर ७० साक्षी र प्रतिवादीको बयान तथा २५ भन्दा बढी पटक सुनुवाइ भइसक्दा पनि यो कानुनी नाटक कहिले सकिने हो, त्यो टुंगो छैन र उल्टै अनिश्चित छ । 

म्याराडोनाको मृत्यु प्राकृतिक कारणले भएको दाबी गर्ने प्रतिवादीले म्याराडोनाका छोरीसँग अदालतमा महिनौं बिताइसकेका छन् । कानुनी प्रक्रिया अर्को महिनामा प्रवेश गर्दा यो असाध्यै नाटकीय बनेको छ । म्याराडोनाका निजी चिकित्सक लियोपोल्डो लुक नै मुख्य अभियुक्त छन् । धेरैले उनलाई नै म्याराडोनाको मृत्युको मुख्य जिम्मेवार मानेका छन् । 

तर उनले कानुनी प्रक्रियामा शूक्ष्म र सतर्क रणनीति अपनाएका छन् । उनी हरेक सुनुवाइमा उपस्थित रहेका छन् । कुनै बयान आफूविरुद्ध जोडिने बित्तिकै उनी कडा आपत्ति जनाउने गर्छन् र आफ्नो तर्क प्रस्तुत गर्छन् । यी चिकित्सकले अहिलेसम्म ९ पटक पटक आफैं हस्तक्षेप गरेर बयान दिएका छन् । त्यस क्रममा उनले अडियो रेकर्डिङ बजाउने र वैज्ञानिक शोधपत्र प्रस्तुत गर्ने जस्ता काम गरेका छन् ।