पोखरा एभेन्जर्सले आउँदो सिजनको नेपाल प्रिमियर लिग (एनपीएल) क्रिकेटका लागि श्रीलंकाका पूर्वस्पिन जादुगर अजन्था मेन्डिसलाई मुख्य प्रशिक्षकमा नियुक्त गरेको हो
काठमाडौं — पोखरा एभेन्जर्सले आउँदो सिजनको नेपाल प्रिमियर लिग (एनपीएल) क्रिकेटका लागि श्रीलंकाका पूर्वस्पिन जादुगर अजन्था मेन्डिसलाई मुख्य प्रशिक्षकमा नियुक्त गरेको छ ।
टोलीको क्रिकेट संरचनालाई थप सुदृढ बनाउँदै बलियो तथा प्रतिस्पर्धात्मक टोलीको निर्माण गर्ने लक्ष्यका साथ मेन्डिसलाई जिम्मेवारी दिएको जनाएको छ ।
पोखरा पहिलो २ सिजनको एनपीएलमा प्ले अफमा नपुग्ने एकमात्र टोली हो । पहिलो २ सिजनको एनपीएलमा पोखराको प्रशिक्षण भारतका राजिव कुमारले सम्हालेका थिए । एनपीएलको तेस्रो संस्करण दसैंपछि हुने बताइएको छ ।
मेन्डिसले आफ्नो रहस्मय अफ स्पिनको सहायतामा श्रीलंकाबाट १९ टेस्टमा ७० विकेट, ८७ एकदिवसीय अन्तर्राष्ट्रियमा १ सय ५२ विकेट र ३९ ट्वान्टी–२० अन्तर्राष्ट्रियमा ६६ विकेट लिएका छन् । टेस्ट क्रिकेटमा उनले ४ र टी–२० अन्तर्राष्ट्रियमा ३ पटक एकै खेलमा ५ वा सोभन्दा बढि विकेट लिएका छन् । उनीसँग इन्डियन प्रिमियर लिग, पाकिस्तान सुपर लिग, बंगलादेश प्रिमियर लिग, बिग बास लिग खेलेको अनुभव पनि छ ।
पोखरा एभेन्जर्सका महाप्रवन्धक अमित लोहनीले मेन्डिसको नेतृत्व क्षमता, प्राविधिक दक्षता तथा अन्तर्राष्ट्रिय अनुभवले टोलीको समग्र प्रदर्शनलाई नयाँ उचाईमा पुर्याउने विश्वास लिएको विज्ञप्तीमा जनाएका छन् । पोखरा एभेन्जर्सको सो विज्ञप्तीमा मेन्डिसले टोलीको हिस्सा बन्न पाउदा आफु गौरान्वित भएको जनाए ।
