काठमाडौँ — जापानको आइची/नागोयामा हुने २० औं एसियाली खेलकुदको तयारीलाई उसुको थाउलो टोलीले चीनको कुन्मिङमा प्रशिक्षण गर्ने भएको छ ।

खेलाडीमा हरि गोले, राजीव तामाङ, दीपक हमाल, विजय सिन्जाली र सविता राई छन् । एसियाली खेलकुदकै लागि छनोट भएकी सुस्मिता तामाङ चीनमै रहेकाले त्यतैबाट टोलीसँग सहभागी हुने छिन् । प्रशिक्षकमा प्रकाश महर्जन छन् ।

एसियाड टोलीबाहेक खेलाडी निमा घर्तीमगर र प्रशिक्षक नविन बस्नेत पनि टोलीसँगै चीन जानेछन् । नेपालस्थित चिनियाँ दूतावासको सहयोगमा खेलाडीलाई युनान विश्वविद्यालयमा प्रशिक्षण राख्न लागिएको नेपाल उसु महासंघका महासचिव नवराज ढुंगनाले जनाएका छन् ।

महासचिव ढुंगानाले तत्काललाई खेलाडी एक महिनाका लागि प्रशिक्षणमा राख्ने र थप एक महिनाका लागि पनि त्यही प्रशिक्षण गराउन पहल भइरहेको बताए । उनले एसियाडमा सहभागी हुने सान्सौं खेलाडीको पनि युनानमै प्रशिक्षणका लागि प्रयास भइरहेको बताए ।