काठमाडौँ — बागमती प्रदेशस्तरीय मेयर कप महिला तथा पुरुष भलिबल प्रतियोगिताको पुरुषतर्फ फाइनल र महिलातर्फ सेमिफाइनल समीकरण पूरा भएको छ ।

महिलातर्फ काठमाडौं महानगरपालिकाले बिगु गाउँपालिकालाई २५–१९, २५–१२, २५–५ ले पराजित गरी सेमिफाइनलमा स्थान बनायो ।

अर्को क्वाटरफाइनलमा गौरीशंकर गाउँपालिकाले धुलिखेल नगरपालिकालाई ३–० को सोझो सेटमा हरायो । गौरीशंकरले २५–२१, २५–२२, २५–२१ ले स्कोर निकाल्यो ।

तेस्रो क्वाटरफाइनलमा बेथानचोक गाउँपालिकाले तार्केश्वर नगरपालिकालाई ३–१ को सेटमा पराजित गर्दै अन्तिम चारमा स्थान बनायो । पहिलो सेट २७–२५ ले गुमाएको बेथानचोकले त्यसपछिका २५–२३, २५–२३, २५–२३ ले सेटमा पुनरागमन गरेको थियो ।

चौथो क्वाटरफाइनलमा ललितपुर महानगरपालिकाले महांकाल गाउँपालिकालाई ३–० को सोझो सेटमा हराएर सेमिफाइनल तय गर्‍यो ।

अब महिलातर्फ शुक्रबार पहिलो सेमिफाइनलमा ललितपुर महानगरपालिकाले काठमाडौं महानगरपालिका तथा दोस्रो सेमिफाइनलमा गौरीशंकर गाउँपालिकाले बेथानचोक गाउँपालिकाको सामना गर्नेछ । शुक्रबार नै तेस्रो स्थानका लागि पनि प्रतिस्पर्धा हुनेछ ।