अन्तर्राष्ट्रिय फुटबल महासंघ फिफाले नेपालमाथि प्रतिबन्ध लगाएपछि सिर्जित अन्यौलपूर्ण स्थितिमा उनले नेपाली राष्ट्रिय टिमको जिम्मेवारी छाडेको बताएका छन् ।
काठमाडौँ — नेपाली राष्ट्रिय पुरुष फुटबल टिमका प्रशिक्षक गुग्लिएर्ल्मो एरेनाले बुधबार राजीनामा दिएका छन् । अन्तर्राष्ट्रिय फुटबल महासंघ फिफाले नेपालमाथि प्रतिबन्ध लगाएपछि सिर्जित अन्यौलपूर्ण स्थितिमा उनले नेपाली राष्ट्रिय टिमको जिम्मेवारी छाडेको बताएका छन् ।
इटालियन मूलका प्रशिक्षक एरेनाले सामाजिक सञ्जालमा लेखेका छन्, ‘फिफाले प्रतिबन्ध लगाएको स्थितिमा मैले नेपालमा गर्न खोजेको फुटबल विकासका योजनालाई अगाडि बढाउन सकिन्न । म अहिलेको स्थितिलाई लिएर निकै निराश छु । अहिले नेपाली फुटबल गतिविधिविहीन स्थितिमा पुगेको छ ।’
उनले अगाडि भनेका छन्, ‘नेपाली फुटबलका सबै तहका लागि खेलाडीको भविष्य अब के हुने हो, त्यसमा मलाई चिन्ता लागेको छ ।’ उनले नेपाली फुटबलमा पर्याप्त काम गर्न नपाएकोमा पनि दुःख व्यक्त गरेका छन् र आफ्नो छोटो बसाईमा नेपालले दिएको माया र सम्मान प्रति कृतज्ञता व्यक्त गरेका छन् ।
नेपालले एरेनाको नेतृत्वमा एकै खेल मात्र खेलेको छ । पछिल्लो मार्च २६ मा नेपालले एसियाकप छनोट तेस्रो चरणको अन्तिम खेलमा लाओसको सामना गरेको थियो । भियानटानमा भएको त्यस खेलमा नेपाल १–० ले पराजित रहेको थियो ।
फिफाले नेपालमाथि प्रतिबन्ध लगाउन अगाडि उनी नेपाल आएका थिए र बंगलादेशमा हुने भनिएको पुरुष साफ च्याम्पियनसिपको तयारीबारे बुझ्ने प्रयास गरेका थिए । तर फिफाको प्रतिबन्ध लगतै उनी आफ्नो देश फर्केका थिए र अहिले उनले नेपाली टिमको प्रशिक्षकको जिम्मेवारी छाडेका छन् ।
