काठमाडौँ — सर्वोच्च अदालतले एसियाली खेलकुदका लागि पौडी खेलाडी छनोटविरुद्ध परेको मुद्दामा अन्तरिम आदेश जारी गरेको छ ।

पौडी खेलाडी इर्भिन श्रेष्ठ, मेधावी केसी र निर्णय थापाले दायर गरेको रिट निवेदनमाथिको बहसपछि न्यायाधीश हरिप्रसाद फुयाल र सुनिलकुमार पोखरेलको संयुक्त इजलासले अन्तरिम आदेश जारी गरेको हो ।

शुक्रबार जारी अन्तरिम आदेशमा निवेदकको माग बमोजिम अन्तरिम आदेश जारी हुनुपर्ने भनिएको छ । अन्तरिम आदेशमा निवेदकको उच्चतम हितसमेतलाई मध्यनजर गरी समयमै उपयुक्त निर्णय लिनू भनिएको छ । राष्ट्रिय खेलकुद परिषद, नेपाल पौडी संघ र नेपाल ओलम्पिक कमिटीबीच समन्वय गरी उपयुक्त निर्णय लिन आदेश जारी गरिएको छ ।

अन्तरिम आदेशमा नेपाल पौडी संघको कानुनी अस्तित्वको सम्बन्धमा विवाद देखिएको उल्लेख छ । निवेदकले उठाएका नेपाली पौडी संघको कानुनी वैधता, राष्ट्रिय खेलकुद परिषदले गरेको पत्राचारको कानुनी वैधतालगायतका विषयमा अन्तिम निर्णय हुँदा विचार गरिने आदेशमा उल्लेख छ ।