सुनसरी — केपीएल कप अन्तर्राष्ट्रिय आमन्त्रण क्रिकेट प्रतियोगिताको उपाधिका लागि छिन्नमस्ता लायन्स र इटहरी सुपर किङ्सबीच फाइनल भिडन्त हुने भएको छ । 

सुनसरीको भोक्राहानरसिंह गाउँपालिकास्थित डा. खलिल अजाद खेल मैदानमा आइतबार सम्पन्न दोस्रो क्वालिफायरमा भारतको आरएमएल स्पोटर्स एकेडेमीलाई २ विकेटले पराजित गर्दै छिन्नमस्ता उपाधिनजिक पुगेको हो । 

यसअघि पहिलो क्वालिफायरमा इटहरी सुपर किङ्ससँग २ विकेटले पराजित भएको छिन्नमस्ताले दोस्रो अवसरको सदुपयोग गर्दै एलिमिनेटर विजेता आरएमएल स्पोटर्स एकेडेमीलाई हराएर फाइनल यात्रा तय गरेको हो । अब उपाधिका लागि छिन्नमस्ता र इटहरी बीच रोमाञ्चक प्रतिस्पर्धा हुने भएको छ । 

दोस्रो क्वालिफायरमा टस जितेर पहिले ब्याटिङ गरेको आरएमएल स्पोटर्स एकेडेमीले निर्धारित २० ओभरमा ६ विकेट गुमाउँदै १७४ रनको प्रतिस्पर्धात्मक योगफल तयार पारेको थियो । उसकालागि अनुभव सिंहले ५३ रनको अद्र्धशतकीय इनिङ खेले । ३८ बलको सामना गरेका उनले ४ छक्का र ३ चौका प्रहार गरे पनि त्यो जितका लागि पर्याप्त हुन सकेन । मञ्जुल दुबेले नटआउट ४७ रन बनाए । अमरचन्द्रले २९ र चक्रधर द्विवेदीले २५ रन जोडे । बलिङतर्फ पप्पु आदव र फिर्दोस अन्सारीले २–२ विकेट हात पारे । 

जवाफमा १७५ रनको लक्ष्य पछ्याएको छिन्नमस्ताले १९.४ ओभरमा ८ विकेट गुमाएर पूरा गर्दै फाइनल यात्रा तय गर्यो । छिन्नमस्ताको जितमा सन्तोष कार्कीले सर्वाधिक ५७ रनको उत्कृष्ट अर्धशतकीय इनिङ्स खेले । उनले ३४ बलमा ६ चौका र ३ छक्काको मद्दतले टोलीको इनिङ्स सम्हाले । आदिल आलमले २७, राकेश कामतले १९, अभिषेक कार्कीले अविजित १७ तथा नितेश यादवले ६ बलमा १३ रनको आक्रामक योगदान दिए । अन्तिम ओभरसम्म पुगेको खेलमा छिन्नमस्ताले संयमित ब्याटिङ गर्दै रोमाञ्चक जित हात पार्यो ।

आरएमएलका बलरहरूले नियमित अन्तरालमा विकेट लिए पनि अन्तिम समयमा चिन्नमस्ताका तल्लोक्रमका ब्याटरले दबाब झेल्दै टोलीलाई जित दिलाए । बलिङतर्फ दिपेन्द्र यादव र क्षितिज त्रिपाठीले २–२ विकेट लिए । अब प्रतियोगिताको उपाधि भिडन्तमा अपराजित लयमा रहेको इटहरी सुपर किङ्स र पुनरागमन गर्दै फाइनल पुगेको छिन्नमस्ता लायन्स मंगलबार आमनेसामने हुनेछन् । पहिलो क्वालिफायरमा इटहरीले छिन्नमस्तालाई पराजित गरिसकेको छ भने छिन्नमस्ता त्यसको बदला लिादै उपाधि उचाल्ने लक्ष्यमा हुनेछ ।