सुनसरी — केपीएल कप अन्तर्राष्ट्रिय आमन्त्रण क्रिकेट प्रतियोगितामा इटहरी सुपर किंग्सले विजयी सुरुआत गरेको छ । शनिबार भएको खेलमा भारतको आरएमएल स्पोर्ट्स एकेडेमीलाई ७ विकेटले पराजित गर्दै इटहरीले प्रतियोगितामा बलियो सुरुआत गरेको हो । 

सुनसरीको भोक्राहास्थित डाक्टर खलिल आजाद क्रिकेट खेल मैदानमा पहिले ब्याटिङ गरेको आरएमएल स्पोर्ट्स एकेडेमीले निर्धारित २० ओभरमा ७ विकेट गुमाएर १ सय १३ रन बनाएको थियो । मन्जुल डुडेले २८ रन बनाउँदा अबान जाफ्रीले २४ रन जोडे । अनुभव सिंहले १८ र सन्दीप गुप्ताले १५ रन बटुलेपछि आरएमएलले १ सय १३ रनको सामान्य योगफल खडा गरेको हो । 

जवाफी ब्याटिङमा उत्रिएको इटहरी सुपर किंग्सले ९.२ ओभरमा ३ विकेट गुमाएर १ सय १६ रन बनाउँदै सहज जित हात पार्‍यो । इटहरीको जितमा अर्जुन घर्ती मगरले विस्फोटक ब्याटिङ गर्दै अविजित ५२ रन बनाए । उनले मात्र १७ बलमा १ चौका र ७ छक्का प्रहार गर्दै टोलीलाई जितसम्म पुर्‍याए । आकाश सर्राफले २२ बलमा ३० रन जोड्दा सुजन थपलियाले ११ बलमा १७ रनको योगदान दिए । सुमित श्रेष्ठ ५ बलमा १० रनमा अविजित रहे । इटहरीले अतिरिक्तबाट ६ रन प्राप्त गरेको थियो ।